Май айны 10-ндан 13-не ерли Тулада оьзлеге 16 йыл битмеген яшёрюмлени арасында тутушуп ябушувдан Россияны чемпионаты оьтгерилди. Шоларда Россияны 55 регионундан гелген 500-ден де артыкъ яш кочаплар ортакъчылыкъ этдилер.
Ярышланы ортакъчыларыны арасында дагъыстанлылар лап кёп, демек, 50-ден артыкъ адам бар эди. Уьч гюнню узагъында юрюлген тогъа-тартывланы натижаларына гёре бизин яшлар лап гючлюлерден болуп чыкъдылар. Олар 3 алтын, бир гюмюш ва 11 бронза медаль къазандылар. Бизин яшлар оьзге регионланы командаларына къошулуп да лап оьр натижалар гёрсетмеге бажардылар: 35 кило авурлукъда уллубойнакълы Жамболат Жамалов Россияда биринчи болду. Бу – уллубойнакълы тренер Салим Гьапизовну гезикли уллу уьстюнлюгю.
Дагъыстанлыланы артына экинчи ва уьчюнчю ерлеге Мычыгъышны ва Москваны командалары тизилдилер. Къарабудагъгент районну Ленингент юртундан чыкъгъан яш кочап Гьасбулла Жумаваров (100 кило авурлукъда) Дагъыстанны ва Темиркъазыкъ Кавказны чемпионатларында лап оьр даражагъа етишген эди. Ол Россияны чемпиону да болду.
