Бугюнлерде райондагъы яшланы спорт школасында ябушмагъа уьйренеген, оьзюню атын дюнья оьлчевюндеги ярышлагъа чыгъаргъан гиччи кочап Динислам Жанбалов гиччи яшланы арасында спортну токъалаш журасындан дюньяда биринчилик алмакъ учун Ростов областда оьтгерилген уллу ярышларда ортакъчылыкъ этип, 40 кило авурлукъда ябушуп, спортну токъалаш журасындан дюньяны чемпиону деген атгъа экинчи керен ес болду. Ол биринчи керен дюньяны чемпиону деген атны 2012-нчи йылда Индияны тахшагьары Делиде болгъан ярышларда алгъан эди. Бу гезик Динислам булан Ростов областда болгъан дюньяны чемпионатында ону булан бирге ябушмагъа уьйренеген къурдашлары Салахан Салаханов 45 кило авурлукъдан 2-нчи ерни, Камил Будайчиев 34 кило авурлукъдан ва Къазават Къазаватов 26 кило авурлукъдан 3-нчю ерлени алдылар. Бу дёрт де улан дюнья чемпионатында ортакъчылыкъ этип, барысы да савгъатлы ерлени алып гелмеклик – яш спортсменлер учун уллу уьстюнлюк, уллу гьюнер. Озокъда, оланы ябушмагъа уьйретеген, тарбиялайгъан тренери Микайыл Салаватов да макътавгъа тийишли.
Спортну токъалаш жураларындан дюньяны эки керен чемпиону болгъан Динисламны гьакъында айтсакъ, огъар гьали 13 йыл бола, ол спортну бу журасы булан 2009-нчу йылдан башлап машгъул. Ону башлап Гьюсейн Муталимов ябушмагъа уьйрете эди. Динислам биринчилей 2011-нчи йылда ушу-саньдадан Россияны чемпиону бола. 2012-нчи йылда буса, биз оьрде де эсгерип гетгенибиз йимик, Динислам Дели шагьарда дюньяны чемпионатын утуп геле. Шо йыл ол халкъара турнирлени, Россия ва Дагъыстанны уллу ярышларында ортакъчылыкъ этип, биринчи ерлени ала.
Динислам 2013-нчю йылда болгъан бары да уллу ярышларда ортакъчылыкъ эте. Дагъыстанны ва Россияны чемпионатларын ута, халкъара ярышларда биринчи ерлени ала, Евроазия оюнланы чемпиону бола.
– Спорт яшны янгыз къаркъара гючюн болдуруп, къуватлы этип къоймай, ону ругь янын да тарбиялай, низамгъа сала, спорт яшда ватандашлыкъны, патриотлукъну – Ватанына, халкъына бакъгъан сюювню де уята, тарбиялай. Дюнья ярышларда ортакъчылыкъ этеген яшлар барысы да Ватаны учун ябушмагъа чыгъа. Олар уллу Россияны ватандашлары экенин унутмай, – дей бизин булангъы лакъырында Динисламны атасы Марат Жанбалов.
Биз яш спортсменлени, оланы тренери Микайыл Салаватовну, яш кочапланы ата-анасын дюнья ярышларында етишген уьстюнлюгю, савгъатлы ерлени алгъаны булан гьакъ юрекден къутлайбыз, олагъа гележекде спортда ва яшавунда насип, савлукъ ёрайбыз
Жават Закавов.
Суратда: (солдан онггъа) дюньяны чемпиону Динислам Жанбалов, экинчи ерни алгъан Салахан Салаханов ва бронза медаллагъа ес болгъан Камил Будайчиев,
Къазават Къазаватов.
