Команданы еси Сулейман Керимов команданы генеральный директорун, баш тренерин ва бары да администрация составын жыйып, «Анжи» бу йыл премьер-лигада къалма бажармаса, «Анжини» харж булан таъмин этивню токътатма хыялы барны билдирген. Айтгъанлай да, Керимовну «Анжиге» чыгъарагъан харжы, этеген къасты,гьаракаты, гетеген заманы команда лап ахырынчы ерде болсун деп этилеген ишлер тюгюл чю. Муна бу танапусда да Керимов футбол майданны ортасында ойнайгъан Билялетдиновну, Быстровну, Алиевни, Трошечкинни, Гьажи Махачевни, якълавчу Епурянуну, чапгъынчылар: Смоловну, Бухаровну, толу кюйде дыгъарлагъа къоллар да салып, «Анжиде» ойнажакъ этди. Олардан къайры якълавчу Ломич майданны ортасында ойнайгъан Коронов чапгъынчылар Адийя, Сапогов ва бизин Шамил Асилдаров, дыгъарлар болмаса да, команда булан гележек оюнлагъа онгарыла. Аслу составгъа гирмек учун оьзюн гёрсетип, баш тренерни оьзюню оюнуна рази этип бажарса, командада ойнажакълар.


Аделейе, Абдул Разакъ, Де­мидов, Соломатин, Гатагов, Жусилей ва Траоре буса бизин командадан гетди. Баш тренерибиз Гьажи Гьажиев айтагъангъа гёре, командагъа дагъы да бир-эки футболист гелмеге имканлы. Февраль айны ахырында Европа лиганы кубогуна «Анжиге» бельгиялы «Генк» командасы булан эки оюн ойнама тарыкъ, шо саялы команда алдын Европа лигагъа заявка этген составгъа, регламент булан ихтияр берилеген дагъы да Бухаровну, Алиевни ва Смоловну къошду.


Тюркияда алты оюн да ойналды. Шо оюнларда бизин тренерлерибиз бары да футболистлеге оьзлени гёрсетме имканлыкъ берди. Кюйге къарагъанда, Европа лигагъа гьазирлик гёрмек учун дагъы да бир нече оюн ойналажакъ. Сонг, ойналгъан ва ойналажакъ оюнланы натижасында команданы составы мекенли болажакъ. Футболну сагъынгъан къаравчулар буса, эки жума да гетмей, Раменское шагьарда Европа лигагъа ойналажакъ «Анжини» «Генк» булангъы (Бельгия) оюнун къаравуллап тура.