Тренер Бийкъылыч Бийболатов


Республикада авур атлетикадан белгили тренер Бийкъылыч Бийболатов Бабюртда белгили механизатор ва комбайнёр Абдулбасирни агьлюсюнде тувгъан. Оьзюне 15 йыл болагъанда ол авур атлетика секциягъа язылгъан. Шо заман ол 2 номерли орта школада охуй болгъан. Ону биринчи тренери – бизин Дагъыстанда айтылгъан Абсалютдин Борагъанов.



– Гьалиден 42 йыл алда авур атлетика секциягъа яшланы язма деп школалагъа юрюй эдим. Бийкъылычны мен яшланы арасында тез эс этдим. Башгъалардан бираз къаркъарасы къатты гёрюнеген саялы ону сайладым ва секциягъа чакъырдым.


Арадан аз заман гетип, ол ра­йонну чемпиону болду. Сонг буса Бийкъылыч 82 кило авурлукъда Дагъыстанны чемпиону деген атны да къазанды. Айтагъаным, шо йыллар бизин Бабаюртну авур атлетлери республика чемпионатларда кёп савгъатлар къазана эди. Бийкъылыч о йыллар гиря да яхшы гётерегени эсимде, – дей Абсалютдин Борагъанов.


Хасавюрт шагьарда «Ленин ёлу» газетни савгъатларына 1975-нчи йылда оьтгерилген республика турнирде бабаюртлу яш атлет биринчи ерни алгъан.


– Мени биринчи тренерим Абсалютдин Борагъановну къастлыгъы булан мен Дагъыс­танны чемпиону 1975–1979 йылларда дёрт керен болдум. Гиря гётеривде де республиканы эки керен чемпиону болдум. Къыбла Россияны чемпионатына да бардым, – деп, ол о йылланы эсге ала.


Ол бугюн Бабаюрт районда яшланы спорт школасында (директору Марат Шихалиев) тренер болуп ишлей. Иш стажы – 24 йыл. Тренер гьисапда ол уьйретген биринчи учениги Солтахан Бийболатов 2003-нчю йылда Дагъыс­танны чемпиону бола.


Бийкъылыч Бийболатов – ишин кёп сюеген ва яхшы бажарагъан тренер. Ол бек саламат адам.


Арадан уьч йыл гетип, ону учениги Рустам Бийболатов 56 килода яшланы арасында Россияны чемпиону болгъан. Шо атны ол дагъы да эки керен утгъан ва Европаны чемпионатына барып, онда дёртюнчю ерни алгъан. Бугюн ону группасында респуб­ликагъа атлары айтылгъан беш атлет бар.


Тренер учун шо – уллу уьс­тюнлюк. Мисал учун, Арсланали Дибиров, Уллубий Бийболатов, Михаил Быканов ва Муслим Мухтаров Дагъыстанны чемпионлары болдулар.


Уллубий ва Михаил буса Темиркъазыкъ-Кавказ федерал округну чемпионатларында уьчюн­чю ерни де къазангъанлар.


– Бугюн Бабаюртда атлетлер учун бары да имканлыкълар яратылгъан. Беш помост ва эки багьалы штанга да бар. Алдын ра­йонну башчысы болуп ишлеген, бугюн Дагъыстан Республиканы авур атлетика федерациясыны президенти Адилхан Гьанакъаев яш атлетлеге тренировкалар оьтгерме уллу зал къуруп берди, –дей Бийкъылыч.


Юртлу яш атлетлени гючлю болма уьйретеген тренер Бийкъы­лыч Бийболатовгъа уьс­тюнлюклер ёрайыкъ.

       Суратда: Б. Бийболатов.




                                                     

Авторизация
*
*
Регистрация
*
*
*
Согласны с условиями сайта?
Генерация пароля