Чемпионлары булан оьктем

Мунда шо школаны 18 йыллыгъына багъышланып шатлы чаралар оьтгерилди. Шатлы чаралар школаны гимни булан ачылгъан сонг, Россияны ат къазангъан тренери, «Дагъыстан Республиканы алдында етишген уьстюнлюклери учун» деген орденни кавалери, Россияны художниклерини союзуну члени, «Лап яхшы тренер» деген номинацияда Россияны алтын поясыны милли савгъатын къазангъан ва бу школаны къургъан, ону директору болуп ишлеп турагъан Гь. Магьомаев жыйыл­гъанланы алдына чыгъып сёйледи. Ол оьзюню къутлав ва баракалла сёзлеринден сонг, яшлар – бизин алтын хазнабыз, биз олагъа янашагъан кюйден оьзюбюзню гележегибиз гьасил болажакъны, яш нас­лугъа кёп тергев берме, оланы якълама герекни эсгерди.

Школаны тарихи гьакъда Гь. Магьомаевни яшав ёлдашы, агьлюсю О. Магьомаева къужурлу далиллер гелтирип хабарлады. Оьзю къурулуп ишлеме башлагъан 18 йылны ичинде бу школаны охувчулары, гертиден де, уллу даражалагъа етишип тура. Мунда спорт булан машгъул бола­гъан яшлар шо йылланы ичинде 3266 медаль къазангъан. Оланы 2359-у – алтын медаллар, 520-сы – гюмюш, 387-си де – бронза медаллар. Мунда охуйгъан яшлар билим якъдан да артда къалмай, яшавда адилли ёлланы танглай.

Школаны байрамында оьзлени къутлав сёзлери булан Дагъыстан Республиканы билим берив, илму ва яшёрюмлени ишлерине къарайгъан министерлигини баш специалисти Р. Абдулбасирова, Буйнакск район администрацияны башчысыны заместители Гь. Ражбутдинов, бу школада оьз заманында билимлер алгъан, спортну сырларына мекенли кюйде тюшюнген белгили спортсменлер Россияны спортуну ат къазангъан устасы, ушу-саньда ябушувдан дюньяны беш керен чемпиону Б. Атаев, Россияны спортуну ат къазангъан устасы, ушу-саньда ябушувдан дюньяны уьч керен чемпиону Ж. Белетов, ушу-саньдадан Европаны чемпиону, Россияны бир нече керен чемпиону болгъан Р. Ибрагьимов, спортну халкъара даражалы устасы, 2012-нчи йылда оьтгерилген Олимпия оюнланы ортакъчысы, тхэквандо ябушувдан дюньяны чемпионатында эки керен алдынлыкъны алгъан Г. Умаров, Россияны спортуну устасы, паратхэквондодан дюньяны чемпиону, дюньяны кубогун къазангъан, Европаны ва Россияны чемпиону болгъан З. Атаев ва башгъалар чыгъып сёйледилер. Оланы гьариси оьтген йылланы ичинде школа уллу уьстюнлюклеге етишгенин эсгердилер, оьзлеге нечик таъсир этгенни гьакъында хабарладылар. Бу школа макътавлу мердешлерин узата геле.

«Буйнакск район» деген муниципал къурулувуну башчысы Д. Шихсайитовну атындан Халимбекавулдагъы «Пять сторон света» деген спорт школагъа савгъат гьисапда теннис ойнайгъан стол тапшурулду.

Сонг жыйылгъанлар учун шатлы концерт гёрсетилди. Жыйылгъанлар школаны охувчуларыны ушу-саньда ябушувдан гьюнерлерине къарады.

Н. АРСЛАНОВА.

М-Гь. ЗАЙДИНОВ чыгъаргъан сурат.

Авторизация
*
*
Регистрация
*
*
*
Согласны с условиями сайта?
Генерация пароля