Футбол башланып, йигирма секунд да гетмей, «Анжини» алдынгъы оюнчусу Александр Кокорин Люксембургну къапусуна биринчи топну гийирди. Оюнну отуз алтынчы минутунда Кокорин бирдагъы гол гийирме болду. Танапусдан сонг, «Зенитни» оюнчусу Александр Кержаков оюнну 3–0 санавгъа чыгъарды. Оюн битмеге аз къалгъанда, Люксембургну чапгъынчысы Аурельен Йоахим бизин якълавчуланы хатасындан пайдаланма бажарды, 3–1 санав этди. Аз заман да гетмей, «Динамону» футболисти Самедов (о да Александр) 4–1 санавгъа етишдирди. Оюн шолай битме де битди.
Экинчи оюн буса сентябрни 10-нда Санкт-Петербургну къаравчуларындан толгъан «Петровский» стадионунда оьтгерилди. Оюнну биринчи бёлюгюнде, бизинкилер нечакъы гьаракат этсе де, Израилни командасыны къапуларына бир топ да гийирме болмады. Танапусдан сонг, экинчи бёлюк башланып, беш минут да гетмей, «ЦСКА»-ны якълавчусу Василий Березуцкий оюнну санавун ачды. Узакъ къалмай къайтып Александр Кокорин 2–0 санавгъа чыгъарды. Арадан он беш минут да оьтмей, «Спартак» команданы орта майданында ойнайгъан футболисти Денис Глушаков Израилни къапусуна уьчюнчю топну гийирди. Оюнгъа берилген токъсан минут битип, баш судья къошгъан дёрт минутну ичинде Израилни чапгъынчысы Эран Захави бизин къапучубуз Акинфеевни де къуру къоймай, гол этип, 3–1 санав булан оюн битди.
Энни Россияны командасына дагъы да эки оюн ойнама тарыкъ. Люксембург булан оланы майданында ва Азербайжан булан Бакюде. Экисин де утуп, Россия Европаны чемпионатында ортакъчылыкъ этежекге къаравчуланы шеклиги ёкъ.
Бизин «Анжи» буса Москвада «Лужники» стадионда айны он бешинде Россияны чемпионатында, Томск шагьарны командасы булан ойнама гьазирлик гёрюп тура.
