«Анжиге» къуршалгъан алты футболист оюнда толу кюйде ортакъчылыкъ этип болмайгъаны Ташуевге команданы толумлашдырывда бир тюрлю четимликлер тувдурду. Неге тюгюл, Эвертон, Тагирбеков ва Митришев травмаларын сав эте, Чуперка къызыл карточкадан сонг «ял» ала, Сердеров, Мутари ва Григалава буса оьзлер къуршалгъан жыйым командалар учун ойнамагъа гетген.
Оюнну «Анжи» къонакъланы яхшы къысып башлады. «Тосно» буса сав командасы булан оьзлени къапусуна тартылып, «Анжини» гючлю гьужумуна къаршы токътап, аз буса да, оьзлер де чапгъын этмек учун мюгьлетлер излемеге къарады. Тек он уьчюнчю минутда узакъ гьужумну натижасында уьстюнлю кюйде оьзюне берилген топну онгайлы кюйде къабул этип, Янник Боли оюнну санавун ачды. Къонакъланы къапуларына гирген шо гол оюнну барышындагъы ахырынчы гол экенине къаравчуланы бириси де инанмай эди. Къонакъланы къапуларына гирген голдан сонг оьзюню башында йимик оюнну ахыры иштагьлы болмады.
Гьасил чыгъарып айтса, эки де команда, оюнну барышында яхшы гьаракатчылыкъ гёрсетип, оьзлени къызгъанмайлы, бири — биринден къалышмайгъан гючлю командалар экенине ким де мюкюр болар йимик ойнады. Тюзю, «Анжини» якълавчулары оьзлени къапусуну ювугъунда къонакълагъа бир сама къоркъунчлу мюгьлет этме къоймады. Бизинкилени буса гол гийирмек учун хыйлы мюгьлетлери болду. Тек не этерсен, оланы «Анжини» футболистлери къолдан чыгъарды.
Не болса да, «Анжи» шолайлыкъда 1:0 санав булан оюнну утду ва уьч очко къазанды. Гелеген эки оюнну «Анжи» тыш майданларда ойнажакъ.
Шарапутдин КИШИЕВ.
СУРАТДА: Янник Боли къонакълагъа гол гийире.
