Арсланбек Мамаевни эсделигине

– Дагъыстанны гючлю командалары ортакъчылыкъ этип, булай ярышлар биринчилей оьтгерилди. Эки гюн юрюлген ярышларда къаравчулар къужурлу ва арив оюнланы гёрдюлер. Ярышланы оьтгерме кёмек этген Хасавюрт районну башчысы Жамболат Салавовгъа ва Дагъыстан Республиканы спорт министерлигине баракалла билдиребиз. Юрт администрация да яхшы кёмек этди.

Бизин юртда мини-футболну уллу абуру бар. Уьч ай алда юртну «Арсланбек» деген команда Къыбла Федерал округда уьчюнчю савгъатны алып къайтды. Бугюн буса Къарланюртну командасы Дагъыстанны чемпиону да болду, – деди къурум комитетни председатели Салевдин Мамаев. Депутатланы шагьар жыйыныны председателини заместители Мугьажир Салагьбеков ярышланы ачылывунда булай деди:

– Бизин юртлу белгили спортсмен ва депутат Арсланбек Мамаевни эсделигине багъышлангъан шулай турнир оьтгерилегени нечакъы да яхшы. Биз ол этген пайдалы ишлени унутмажакъбыз. Спорт­смен гьисапда да Арсланбек ата юрту Къарланюртну оьр этди.

Биринчи ерни Къарланюртну «Арсланбек» деген командасы къазанды. Командагъа кубок, медаллар, футбол гийимлер ва Салевдин Мамаев оьзюнден 10 минг манат савгъат тапшурду. Экинчи ерни Магьачкъаланы командасы алды. «Эндирей» юртну «Акъташ» деген командасы уьчюнчю савгъатны къазанды.

 

 

 

 

И. Гьажиев.

Автор чыгъаргъан суратлар.

Авторизация
*
*
Регистрация
*
*
*
Согласны с условиями сайта?
Генерация пароля