Башлап Алибек боксну танглагъан болгъан. Сонг, атасы айтып (мекенли токъташдырылмагъан маълуматлагъа гёре, Алибекни атасы Али Къарабудагъгент райондан чыкъгъан) футбол секциягъа язылгъан. Тюзю, Венерсборг бир заманда да оьзюню футбол командалары булан макътала гелмеген. Мунда бютюн Швецияда йимик яшлар гиччи заманындан тутуп хоккей булан доланма башлайлар. Сёз ёругъуна айтгъанда, Швецияны «Арланда Уингз» деген хоккей командасында 2013-нчю йылдан берли адилянгыюртлу Алхас Къочкъаров ойнай. Балики, бийик бойлу, токъ къаркъаралы Алибекден де шайлы хоккеист болур эди. Тек атасы уланындагъы футбол оюнгъа бакъгъан якъдагъы айрыча пагьмуларын биринчилерден гёрюп, дурус насигьат берген.

    Алибек ерли клубну футболисти гьисапда бир оюнда да къаршы команданы къапусуна топ гийирмей майдандан гетмеген. Огъар 15 йыл болагъанда яш футболистни оюнуна Швецияны бир нече керен чемпиону болгъан, милли кубогун къазангъан «Эльфсборг» команданы тренерлери тергев берген ва оьзлени клубуна чакъыргъан.

    Арадан уьч йыл гетип, Алибек Алиев Швецияны яшёрюмлерини милли футбол командасы учун ойнама башлагъан. Шо заман ЦСКА-ны  яш пагьмуланы ахтарагъан агентлери А.Алиевге гёз салгъан. Дыгъаргъа гёре ол ЦСКА саялы 5 йыл ойнажакъ.

Алав АЛИЕВ.