Шатлыкъ жыйынны ача туруп, оьрде эсгерилген районну администрациясыны башчысыны заместители Имамутдин Чамсаев физкультураны ва спортну оьсдюрювге байлавлу ерли программа тасдыкъ этилгенин айтды. Шо программагъа гёре, республиканы оьлчевюнде ва ондан тышда оьтгерилген ярышларда алдынлы ерлеге лайыкълы болгъан юртлу спортчуланы, олай да оланы уьйретеген тренерлени якъламакъ учун мекенли чаралар гёрюлегени гьакъда билдирди.
Шондан сонг сёз берилген Къарабудагъгент районну физкультурагъа ва спортгъа къарайгъан комитетини ёлбашчысы – Сиражутдин Салаватов оьтген йылда юртлу спортчулар етишген уьстюнлюклери булан таныш этди. Ол оьзюню сёйлевюнде билдиргени йимик, районну юртларында спортну гьар тюрлю журалары булан машгъул болагъанлар республиканы, уьлкени оьлчевюнде, олай да тыш пачалыкъларда оьтгерилген 46 ярышда ортакъчылыкъ этген ва 170 керен алдынлы ерлеге ес болуп къайтгъан.
–Артдагъы йылларда бизин районну спортчулары мекенли оьрлюклеге етишип гелегени сююндюре,– деди Къарабудагъгент районну гьакимбашы Къапур Исаев. – Бизин спортчулар етишген уьстюнлюклер булан къуванабыз ва оьктем болабыз. Сиз янгыз тувуп-оьсген ата юртугъузну, анадаш районугъузну абурун артдырып къоймайсыз. Тыш пачалыкъларда оьтгерилеген ярышларда алдынлы ерлени алып, савлай уьлкебизни атын да данггъа чыгъарасыз. Сизге, олай да спортну гьар тюрлю жураларына къуршап, сизин булан бирге гьаракатын болдурагъан тренерлеригизге де макътав тийишли. Сиз спортда етишген оьрлюклер, шексиз кюйде, торайып гелеген яш наслуну вакиллерине де уьлгю болуп къалажакъ,– деди ол дагъы да. Къарабудагъгент районну гьакимбашы Къарабудагъгент, Къакъашура, Гьели, Паравул, Манасгент, Агъачавул, Уллубийавул, Губден ва Къурбуки юртлардан чыкъгъан спортчулагъа ва оланы тренерлерине акъча савгъатлар тапшурду. Районну спортчуларыны аслам пайы ябушув булан машгъул болагъаны гьакъда айта туруп, ол гележекде спортну оьзге жураларына да тергевню артдырмагъа тюшегенин эсгерди.
Спортну гьар тюрлю жураларындан оьтгерилген ярышларда алдынлыкъ алгъан юртлу спортчуланы гьюрметине багъышлангъан шатлы жыйын ерли йыравланы концерти булан тамамланды.
Н. БАЙБОЛАТОВ.
А. Саматов чыгъаргъан сурат.
