Лап аслу ябушувларда белгили дагъыстанлы кочап Расул Мирзаев (ол Москвадагъы спорт клубну атындан баргъан) ва мычыгъышлы спортсмен Магьамматэмин Хажгериев бир-бири булан гюч сынагъан. Олар экиси де алдынлы ерге чыкъмагъа кёп гьаракат этген, тек ябушувланы экинчи бёлюгюнде Расул ону болжалдан алда утмагъа бажаргъан.
Шо ярышларда бизин якълы, Буйнакскидеги «Гьажимурат» деген спорт клубдан баргъан Абуталип Халилов да гёрмекли натижалагъа етишген. Бу улан шонда оьзюню тренери Мурат Гьамзатов булан баргъан.
22 йыллыкъ спортсмен Абуталип шолай уллу ярышларда лап гючлю кочаплар булан ябушагъаны – бу уьчюнчю керен. Алда да ол бир нече чемпионатларда уьст гелген. Гьали буса Мычыгъышдан да огъар чемпион болуп къайтмагъа насип болду. Ол бу ярышда украинли спортсмен булан ябушгъан. Экинчи раунд янгы башланып турагъанда, Абуталип ону хантавлатып, аягъы булан гючлю кюйде ура ва украинлини нокаут булан утмагъа бажара. Бизин якълы спортсмен шо уьстюнлюгю саялы алтын медаль булан савгъатлангъан ва огъар акъча савгъат да тюшген.
А. Халилов буссагьат декабр айны орталарында Нефтеюганск шагьарда болажакъ «Битва на Севере-2» деген халкъара турнирге барма гьазирлене. Ону тренери М. Гьамзатов билдиргени йимик, шо турнирде Абуталип Франциядан гележек гючлю спортсмен Серж Дали булан ябушажакъ.
Оьз мухбирибиз.
Суратда: (онгда) Абуталип Халилов.
