Яш шагьматистни уьстюнлюгю

14 февраля 2020 в 22:02 297
Яш шагьматистни уьстюнлюгю

      Артдагъы вакътилерде янгыз тутушуп ябушувда тюгюл, спортну оьзге жураларында да бизин яшлар гёрмекли оьрлюклеге етишип гелегени айрыча гьис этиле. Демек, шагьмат йимик спортну журасы булан машгъул болагъанланы санаву баргъан сайын арта. Оланы кёплери гюч сынап тюгюл, оьзлени иттилиги, билими ва гьакъылы булан спортда мекенли оьрлюклеге багъып инамлы кюйде абат ала.


Шолай, шагьмат оюндан Европаны оьлчевюнде юрюлген ярышларда алдын да эки керен уьстюнлюк алгъан Таймаз Темирбеков бираз алда тамамлангъан «Moscow open 2020» деген халкъара ярышларда алтын медаль къазангъан. Оьтгерилген шо ярышланы вакътисинде 9 йыл чагъындагъы 200-ден де артыкъ уланъяш къуршалгъан гюпде ол бары да тиретлерден бир де утулмагъан кюйде уьстюнлю кюйде оьтюп, 8 очко къазангъан. Ачыкълашдырып айтгъанда, Макъсутдин Жанболатовну алдында тарбияланагъан яш спортчу гьатта гьалиге ерли уьлкени чемпиону гьисапланып тургъан Артём Лебедев булан шагьмат ойнап да утулмагъан.


Дагъыстанны шагьмат оюнгъа къарайгъан федерациясыны ёлбашчысы, халкъара даражалы гроссмейстер Жакъай Жакъаевни сёзлерине гёре, яш шагьматистлер учун оьтгерилген турнир инг агьамиятлыларындан бириси гьисаплана. Айрыча Таймаз Темирбеков, олай да он алтынчы керен оьтгерилеген шо ярышларда оьзлени бажарывлугъун гёрсетген яш шагьматистлени усталыгъы бу йылны апрель айында Сочи шагьарда Россияны оьлчевюнде алдынлыкъ алмакъ учун юрюлежек ярышларда да тизив натижалагъа етишмеге болажагъына инамлыкъ тувдура.


 

Б. АЙБОЛАТОВ.

Суратда: Ж.Жакъаев, Т.Темирбеков ва М.Жанболатов.