Белгили экени йимик, бираз алда Къазахстанны тахшагьары Нюрсолтанда спортну ябушув журасындан дюньяны гезикли чемпионаты тамамлангъан. Ачыкълашдырып айтгъанда, сентябр айны 14-нден тутуп, 22-не ерли аралыкъда тутушуп ябушувдан, олай да ябушувну грек-рим журасындан тогъатартывлар оьтгерилген. Ондан къайры да, шонда тиштайпаланы да ябушувда усталыгъы сыналгъан.
Шону булан бирге, дюньяны оьлчевюнде инг сынавлу гьисапланагъан кочаплар ортакъчылыкъ этген шо ярышланы барышында ябушув халчада юрюлген тогъатартывларда дагъыстанлы спортчулар лап да яхшы натижалагъа етишгени гьакъда инамлы кюйде айтмагъа ярай.
Абдулрашит Садулаев
Шо гьакъда айта туруп, Россияны ва оьзге уьлкелени жыйым командаларына къуршалгъан дагъыстанлы кочаплар «Барыс-Арена» деген спорткъаласында юрюлген гюч сынавланы барышында гьар тюрлю даражалы медалланы къазанмагъа бажаргъанын бир сююнчю гьисапда билдиребиз. Хасавюрт районну Чогъаротар юртунда тувуп оьсген Завур Угуев оьр даражалы ярышларда алтын медаль къазанып, оьзюне берилген инамлыкъны гертиледи, ябушувлар юрюлеген халчада сыртын ерге тийдиртмеге къоймагъаны бизин бек къувандырды. Айтагъаным, ол 57 кило авурлукъда дюньяда бугюнлерде оьзюне тенг гелеген кочап ёкъ экенин исбат этди. Шолайлыкъда, Завур кочабыбыз спортну тутушув ябушувдан дюньяны эки керен чемпиону болду.
Ярышланы бары да тиретлеринден оьтюп, Завур Угуев финалда тюрк кочап Сулейман Атли булан ёлукъду. Шо тогъатартывну лап башында тюрк кочап оьзюню айрыча гьаракатчылыгъын гёрсетсе де, экинчи тиретде Завур Угуев бары да гючюн жыйып, тартынмай, чалтлыгъын тас этмей, ярышда баш алмагъа, оьзю булан чыкъгъан кочапны 13:3 санав булан гёрсетилген болжалдан эсе алда утмагъа амал этди.
Нюрсолтан шагьарда спортну ябушув жураларындан юрюлеген дюньяны чемпионатында Завур Угуевден къайры да, Олимпия оюнланы чемпиону Абдулрашит Садулаев ябушув халчада азербайжанлы кочап Шарип Шариповну енгди, 97 кило авурлукъда алтын медаль къазанды. Сонг да, Гьажимурат Рашитов, къатынгишилени арасында Инна Тражукова 65 кило авурлукъда алтын медаль алдылар. Олар булан бирге Магьамматрасул Идрисов 61 кило авурлукъда гюмюш медальгъа ес болду. Адилхан Жабрайылов ва Гьажи Набиев 92 ва 79 кило авурлукъларда бронза медаллагъа лайыкълы болгъан.
Гьажимурат Рашитов
Оьтгерилген дюнья оьлчевюндеги чемпионатда алдынлыкъ алгъан кочаплар гелеген йыл Токио шагьарда юрюлежек Олимпия оюнларда ортакъчылыкъ этежеклер. Дюньяны чемпионатында уьстюнлюклеге ес болгъан дагъыстанлы кочаплар итнигюн, сентябр айны 23-нде, ватанына къайтгъан. Магьачкъала аэропортда оланы дос-къардашы, ДР-ни гьакимлик къурумларыны вакиллери, олай да бизин кочапланы ярышларда гёрсетеген гьаракатына тергев этип тургъан кёп санавдагъы адамлар шатлыкъ шартларында къаршылагъан.
Тутушуп ябушувдан оьтгерилген дюнья чемпионатында алдынлыкъ алгъан кочаплар булан Дагъыстанны Башчысы Владимир Васильев де ёлукъгъан. Ябушув халчада къайпанмайлы, оьзлени гьюнерин ва усталыгъын гёрсетген кочаплагъа ва оланы тренерлерине пачалыкъ савгъатлар тапшургъан.
Бизин кочапланы оьр даражада юрюлеген ярышларда къолда этмеге болгъан уьстюнлюклери булан газетни къуллукъчуларыны ва охувчуларыны атындан биз де гьакъ юрекден къутлайбыз.
Инна Тражукова
