Къаягентлилер – алда

 Къаягентлилер – алда

       Январны 31-нден февральны 1-и болгъунча тутушуп ябушувну Избербаш шагьардагъы спорт школасыны залында яшёрюмлени арасында тутушуп ябушувдан Дагъыстанны зона чемпионаты оьтгерилди. Ярышларда Къаягент, Сергокъала, Къарабудагъгент районлардан ва Избербаш, Каспийск шагьарлардан гелген 100-ден де артыкъ яш кочаплар ортакъчылыкъ этдилер.


Эки гюнню узагъында Избербашны спортзалында юрюлген ябушувларда Рустам Алиев 35 кило (Къаягент район), Муса Пайзуллаев 38 кило (Къаягент район), Абдукарим Алиев 41 кило (Каспийск), Магьаммат Абидинов 44 кило (Каспийск), Магьаммат Сонгурбеков 48 кило (Къарабудагъгент район), Магьамматали Зайпуллаев 52 кило (Сергокъала район), Набигула Омаров 57 кило (Сергокъала район), Алиболат Валиев 62 кило (Къарабудагъгент район), Осман Османов 68 кило (Кас­пийск), Абдулгьамит Къазалиев 75 кило (Избербаш), Абдулмуъмин Магьамматшапиев 85 кило (Къарабудагъгент район) алдынлы ерлени алгъан.


Жыйым командаланы арасында Къаягент районну яш кочаплары биринчи ерге ес болдулар. Олар эки алтын, 6 гюмюш, 6 бронза медаллар къазандылар. Сонг да, оланы 7 кочап 4 ва 5-нчи ерлеге чыкъдылар. 2-нчи ва 3-нчю ерлерде Къарабудагъгент районну ва Каспийск шагьарны командалары ерлешдилер. Уьст болгъанлагъа медаллар ва дипломлар тапшурулду. Оланы барысы да февральны ахырында оьтгерилежек республика ярышларында ортакъчылыкъ этежек.


Избербаш шагьар администрацияны спортгъа къарайгъан бёлюгюню башчысы Исамагьаммат Гьамитовну айтывуна гёре, ярышлар къурумлу оьтгерилген. Олагъа къарамагъа гелгенлер халчада кёп къужурлу ябушувланы гёрмеге болгъанлар.