Адильянгыюртлу – Европаны чемпиону


Италияны тахшагьары Римде тутушуп ябушувдан чагъы 20 йылдан оьтмеген яшланы арасында Европаны чемпионаты оьтгерилген. Шо ярышларда Хасавюрт шагьардагъы «Спартак» деген хас олимпия спорт школагъа юрюйген Азнавур Таваев алтын медалгъа ес болуп къайтгъан.


 


Ол 65 кило авурлукъда тогъатартмакъ учун халчагъа 4 керен чыкъгъан, шо ёлугъувларда барысын да утгъан.



Къумукъ улан ярымфиналда Болгарияны чемпиону Демитро Ангеловну 10:0 санав булан утуп, финалгъа чыкъгъан. Алтын медаль учунгъу ябушувда Азнавур молдовалы Николае Грамез булан ёлукъгъан. Финалда ол халчада оьзюню къастлыгъын, усталыгъын гёрсетип, 14:4 санав булан утуп, Европаны чемпиону болгъан. Азнавурну Европаны чемпионатына тренери Арсен Бийболатов гьазирлеген.



Азнавургъа 19 йыл битген. Ол Бабаюрт районну Адил Янгыюртунда тувгъан. Тутушуп ябушув булан машгъул 9 йыл тамамлангъан. Бу йылны башында Азнавур оьрюм яшланы арасында Смоленск шагьарда оьтгерилген Россияны чемпионатында гюмюш медаль къазангъан. Ол Дагъыстанны ва халкъара турнирлени чемпиону да дюр. Бабаюрт районну тарихинде Европада чемпион атны къазангъан биринчи кочап экенин де эсгерме тийишли гёремен. Ол – гележеги бар кочап. Азнавурну уьстюнлюгюнден биз де сююнебиз ва къутлайбыз.



Авторизация
*
*
Регистрация
*
*
*
Согласны с условиями сайта?
Генерация пароля