Дагъыстанлылар лап кёп медаллар къазанды


Пятница, 18.05.2018г. - "ЁЛДАШ".


Бизин республикада тутушуп ябушувгъа тезден берли мекенли кюйде тергев берилип геле. Бизин кочаплар лап оьр даражада юрюлеген ярышларда йылдан — йылгъа гёрмекли оьрлюклеге етишип гелегени шогъар шагьатлыкъ эте.



Шону булан бирге, янгыз би­зин уьлкени тю­гюл, тыш пачалыкъланы кочаплары ортакъчылыкъ этивю булан мердешли кюйде ярышлар оьтгерилип гелегени де спортну шо журасына некъадар агьамият берилегенин исбатлай. Тутушуп ябушувда етишген оьрлюклери булан оьзюню атын данггъа чыгъармагъа бажаргъан Али Алиевни эсделигине ба­гъышланып 49 йылны узагъында бир де арасы бёлюнмеген кюйде юрюлеген турнир шолай оьр даражадагъы ярышланы бириси гьисаплана.



Эсгерилген турнирде тогъа­тартмакъны инг де белгили кочаплар тийишли гёре. Бу гезик де, ачыкълашдырып айтгъанда, май айны 11-нден 13-не ерли Каспийскиде А. Алиевни атындагъы яшёрюмлени ва спортну къаласында юрюлген турнирде 12 уьлкеден 150-ден де артыкъ кочап тогъатартгъаны шону гертиледи. Олар уьч гюнню узагъында 10 тюрлю авурлукъда ябушув халчада биринден-бири къыставуллу ва къужурлу кюйде юрюлген сынавлардан оьтдю. Озокъда, лап да бажарывлу, оьте пагьмулу кочаплар алдынлы ерлени къазанды.



Шо гьакъда айтгъанда, дагъыстанлы кочапланы уьстюнлюклери айрыча разиликни тувдура. Дейгеним, олар турнирде 5 алтын, 7 гюмюш, олай да 11 бронза медаль къазанды. Шолайлыкъда, турнирде ортакъчылыкъ этген оьзге жыйым командалардан санав якъдан да, дагъыстанлы кочаплар сан якъдан да оьз­леге тенг гелегенлер аз экенин гёрсетди деп айтмагъа ярай.


 

Авторизация
*
*
Регистрация
*
*
*
Согласны с условиями сайта?
Генерация пароля