Пятница, 20.04.2018г. — «ЁЛДАШ».
Бугюнлерде белгили кочап Муслим Салигьов халкъара оьлчевдеги ябушув къурумда оьзюню биринчи оьрлюгюн алды. Ачыкълашдырып айтгъанда, ябушувну къошулчан журасында оьзю булан тогъатартмагъа чыкъгъанланы кёбюсю гьалда енгип гелеген къумукъ улан апрель айны 15-не чыгъагъан гече Глендейл шагьарда америкалы кочап Рикки Рэйни булан ябушув майданчада ёлукъду. Шо ябушув Муслим Салигьовну пайдасына тамамланды. Ол оьтгерилген ябушувну экинчи тиретини вакътисинде америкалы кочапны накаутгъа йибермеге болду.
Шолайлыкъда, Муслим Салигьов халкъара даражада ябушувну къошулчан журасындан юрюлеген турнирлерде гьалиге ерли 14 керен уьст гелгени гьакъда айтмагъа бажарыла. Ол эки керен тюгюл оьзю булан тогъатартагъанланы утуп болмай къалмагъан.
Спортну ябушув журасында етишген уьстюнлюклери булан атын данггъа чыгъаргъан кочап Муслим Салигьовну бизин газетни бары да къуллукъчуларыны ва охувчуларыны атындан гьакъ юрекден къутлайбыз, огъар гележекде де оьрлюклер ёрайбыз.
