Яшланы ярышлары

7 февраля 2020 в 18:26 276
Яшланы ярышлары

       Февраль айны башында Буглендеги спорт къаланы уллу оюн залында Буйнакск районну школаларыны охувчуларыны сайламлы командаларыны арасында баскетболдан алдынлы ерлени алмакъ учун ярышлар болду. Шоларда районну 15 тюрлю школасындан 128 охувчу ортакъчылыкъ этди.


Ярышларда алдынлыкъ алгъан командалагъа ва айрыча гьюнер гёрсетген яшлагъа Буйнакск районну билим берив управлениеси   токъташдыргъан дипломлар, кубоклар ва акъча савгъатлар тапшурулду. Райондагъы школалар оьзлени уллулугъуна гёре уьч тюрлю группагъа бёлюнген эди. Шолайлыкъда, биринчи группагъа гиреген школаланы арасында 1-нчи ер Тёбен Къазанышдагъы 1 номерли лицейни, 2-нчи ер Халимбекавулдагъы школаны, 3-нчю ер де Эрпелидеги школаны командаларына берилди.


Экинчи группада 1-нчи ерге Бугленни, 2-нчи ерге Атланавулну, 3-нчю ерге буса Гьапшини охувчуларыны командалары ес болдулар.


Уьчюнчю группадагъы школаланы арасында Ишартыны командасы 1-нчи ерге чыкъды, Оьр Къаранай ва Манасавул школаланы яшлары 2-нчи ва 3-нчю ерлерде къалдылар.

 

Бизин мухбирибиз.

СУРАТДА: Бугленни ва Атланавулну командалары ойнайгъан вакъти.