Къазбек Къурбановну гьюрметине



         Къарабудагъгентдеги «Олимп» деген спорткомплексинде ябушувну самбо журасындан оьрюм чагъындагъы яшланы арасында республика турнири оьтгерилди. Ярышлар ябушувну эсгерилген журасындан Къарабудагъгентден чыкъгъан спортчуланы арасында биринчилерден СССР-ни спортуну устасы деген оьр атгъа лайыкълы болгъан Къазбек Къурбановну гьюрметине багъышланып юрюлдю.



Къарабудагъгент районну физ­культурагъа ва спортгъа къарай­гъан комитетини, олай да яшланы, яшёрюмлерини юрт спорт школасыны сиптечилиги булан оьтгерилген шо ярышларда 100-ден де артыкъ спортчу ортакъчылыкъ этди. Инг алда ярышланы ортакъчыларыны ва къурумчуларыны алдына чыгъып сёйлеген Къарабудагъгент районну гьакимбашыны заместители А. Гьажиев, «Дагъыстанны яшлыгъы» деген бирлешивюню ёлбашчысы А. Рабаданов, Къарабудагъгент юртну гьакимбашы М-С. Гьасанов ва кёп оьзгелери торайып гелеген яш наслуну санлы яшав юрютювге иштагьландырывну агьамиятлыгъы гьакъда эсгерди.



Шону булан бирге, оьзюню гьюрметине ярышлар юрюлеген Къ. Къурбановну яшавун гёзден гечире туруп, ол ябушувну самбо журасын оьсдюрювге этген къошуму гьакъда да айрыча айтылды. Сонг да, оьз заманында ону алдында ябушувну сырларына уьйренген Б. Магьамматов оьзюню тренери спорт ярышларда гёрмекли уьстюнлюклеге етишгенин ташдырды.



Бир вакътини ичинде Къ. Къурбанов оьзюню алдында тарбияланагъан кочапланы ол оьр болувларын да, уьстюнлюклерин де сезгенин айтып сёйледи. Оьз гезигинде шо турнирни сиптечилерине разилигин билдирди. Ябушув халчаларда гюч сынажакъ кочаплагъа уьстюнлюклер ёрады.



Оьтгерилген ярышланы барышында кочаплар оьзлени авурлукъларына гёре жутланып эки ябушув халчада бир-бирини арасында тогъа­тартды. Гьар къайсы ярышларда да болагъанда йимик, озокъда, шоланы барышында утгъанлар да, утдургъанлар да болду. Ачыкълашдырып айтгъанда, ярышланы гьасиллерине гёре Каспийск шагьарны жыйым командасы биринчи ерни къазанды. Къарабудагъгент ва Къакъашура юртларыны командалары да алдынлы ерлеге ес болду. Олагъа барысына да кубоклардан ва медаллардан къайры, багьалы савгъатлар да тапшурулду.



Авторизация
*
*
Регистрация
*
*
*
Согласны с условиями сайта?
Генерация пароля