Сали Сулейманны атындагъы спорткомплекс ачылды


           Алдагъы жумада Буйнакск районлулар, айрокъда тёбенкъазанышлылар учун эки къабат байрам болуп токътады. Тёбен Къазанышны халкъы савгъатгъа янгы, бары да янындан мукъаятлы онгарылгъан, дюнья оьлчевде белгили кочапны – Сали Сулейманны аты къоюлгъан спорткомплексге ес болду. Спорткомплекс бир нече йыл алда Буйнакск районну депутатларыны жыйыныны председатели Даниял Шихсайитовну сиптечилиги булан къурулма башлангъан эди.



Янгы спорткомплексни ачмакъны ихтияры Дагъыстанны физкультурагъа ва спортгъа къарайгъан министрини заместители Абсамат Гьажиевге, Буйнакск район администрацияны башчысыны биринчи заместители А. Жапаровгъа ва Сали Сулейманны къардашы Салавутдиновгъа берилди. Спорткомплекс ачылгъанда шатлыкъгъа жыйылгъан халкъ залгъа гирдилер.


Къазанышдагъы спорткомплексни ачылывуна кёп санавда къонакълар: Дагъыстан Республиканы топуракъ ва мал-матагь министри Агъарагьим Къагьиргьажиев, ДР-ни Халкъ Жыйыныны депутаты Магьамматхан Арацилов, Дагъыстанны Ростов областындагъы вакили Магьамматсалам Халилов, Азербайжан Республиканы ат къазангъан тренери, «BAKU PIRES» клубуну генеральный директору, Сали Сулейманны торайларыны торайы Ризван Генжеев, белгили спортчулар, Сали Сулейманны къардашлары, Буйнакск район администрацияны вакиллери, депутатлары ва башгъалар жы­йылгъан эдилер.


Шатлыкъ чаралагъа жы­йылгъанланы алдында Буйнакск район администрацияны башчысыны атындан ону биринчи заместители А. Жапаров сёйледи.


«Гьюрметли къазанышлылар, районлулар, къонакълар! Сизин янгы спорткомплексни ачылыву булан къутлайман. Янгы ачылгъан комплекс–ра­йонну оьсюп гелеген яш наслусу ва уллулары да учун уллу савгъат. Спорткомплекс яш нас­лулагъа ва уллулагъа оьзлени бош заманын пайдалы оьтгерме имканлыкъ бережек. Бу комплекс янгыз спортсменлер учун къурулмагъан. Бош заманын тербенишде, савлугъуна пайдалы кюйде оьтгерме сюегенлеге де къурулгъан. Мунда гелип, савлугъун ва спорт гьюнерин артдырып, уллу уьстюнлюклеге етме насип болсун», – деди ол оьзюню сёйлевюнде.


Шатлы чаралагъа гелген къонакъланы арасындан сёйлеген Абсамат Гьажиев де янгы ачылгъан спорткомплекс къаркъарасын савлукъда сакъламакъ учун лап да онгайлы ер болажакълыгъына ва спортгъа бакъгъан якъдан янгы залда санларын чыныкъдырагъанлар да спортда уллу уьстюнлюклеге етишежеклигине шекленмейгенни айтды.


Къазаныш юрт жамиятыны атындан юрт администрацияны башчысы Камил Умаханов сёйледи ва спортгъа бакъгъан якъда этген къуллугъу саялы Буйнакск районну депутатларыны жыйыныны председатели Даниял Шихсайитовгъа баракалла билдирди.


Спорткомплексни ачылывуну чараларыны вакътисинде Буйнакск районда спортгъа бакъгъан якъда уллу уьстюнлюклеге етген 11 спортсменге ва оланы тренерлерине «Баракалла кагъызлар» тапшурулду.


Районда юрюлеген бары да чаралар шат макъамларсыз, къурч бийивлерсиз оьтмейгенде йимик, бу гезик де Буйнакск ра­йонну маданият управлениеси онгаргъан концерт программа гелгенлени гёнгюн ачды, шат этди.


Шатлы чаралардан сонг, спорткомплексде экскурсия оьтгерилди. 900 квадрат метр майданы булангъы залда эркин ябушувдан, боксдан уллу ярышлар оьтгермеге имканлыкълар бар.


Комплексге бир де тартынмай савлукъ сакълав комплекси деп айтма да ярай. Узакъ къалмай спорткомплексни къыры­йында волейбол, баскетбол ва футбол майданчалар да онгарылажакъ. Булай алгъанда, бир гюнню ичинде спорткомплексде 100-150 адам оьзлени санларын чыныкъдырма, бош заманын пайдалы оьтгерме болажакълар.

 

С. ХАНОВА.

Авторизация
*
*
Регистрация
*
*
*
Согласны с условиями сайта?
Генерация пароля