Алдагъы гюнлерде, ачыкълашдырып айтгъанда, июн айны 6-сында, Американы Бирлешген Штатларыны Нью-Йорк шагьарында оьтген турнирни оьлчевюнде гезикли ябушув оьтгерилди. Эсгерилген шо тогъатартывну барышында савлай дюньягъа аты айтылгъан бизин кочап Бозигит Атаев американлы Дэн Спон булан экинчилей де ёлугъуп, низамсыз ябушувларда да ол усталыгъы булан бирге бажарывлугъун гёрсетгенден къайры да, оьзюн ким де енгмеге болмайгъанын бирдагъы да исбатлады. Ябушувну биринчи тиретинде бизин кочап оьзю булан тогъатартмагъа чыкъгъан спортчудан уьст гелди.
Ачыкълашдырып айтгъанда, оьтгерилген ябушувну башлапгъы мюгьлетлеринден тутуп, Бозигит Атаев майданчаны ортасында онгайлы кюйде ерлешип, оьзю булан тогъатартмагъа чыкъгъан кочапны къувуп, тарлыкъгъа салды. Къарышып аякъларыны сыйракъларына тебип, авурлугъун гётермеге болмасдай огъар къапаслар бермеге башлады.
Тюзю, ябушувну биринчи тиретини ортасына етишип турагъанда Бозигит Атаев оьзю булан тогъатартагъан кочап эки керен юмурукълап ургъанда, мекенли кюйде темтиреп, лавлап гетди. Дэн Спон бирдагъы да оьзюне юмурукълап ургъан сонг Бозигит Атаев американлы кочапны сырты ерге тиеген кюйде йыкъмагъа къарады. Шону натижасында олагъа бираз замангъа челтирли майданчаны лап да ягъасында тогъартмагъа тюшдю. Дейгеним, американлы кочап оьзюн тербенмеге къоймай сакълагъандан къутулмагъа айлангъанда, огъар онг къолун юмурукълатып уруп, Бозигит Атаев мурадына етишди деп айтмагъа ярай.
Шондан сонг Дэн Спон бир башлап чёгеленип олтуруп къалса да, аякъгъа турмагъа болду. Тек дагъы да къапаслар алгъан сонг, арадан бир нече мюгьлет де гетгинчеге, чалкъасындан йыгъылып, ерге ятып да къалды. Шолайлыкъда, алгъасамайгъан кюйде ябушувну оьтгерип, юрюлеген турнирде Бозигит дагъы да 6 очко къазанды. Лап да аслусу, Бозигит Атаев шо турнирни оьлчевюнде юрюлген биринчи ябушувда оьзюн утгъан Дэн Спондан ачувун алмагъа болду.
