Гьар къайсы къумукъ юртда да спортну гьар тюрлю журалары булан машгъул болуп оьтгерилеген ярышларда алдынлы ерлени къазанып гелген спортчулар аз тюгюл. Янгыз оьзюню ата юрту Тамазатёбеде тюгюл, савлай Бабаюрт районгъа танылгъан бажарывлу спортчуланы арасында Надирбек Шугьайыбов да бар. Ол спортчу ва муаллим гьисапда эсгерилген районда спортну гьар тюрлю жураларын оьсдюрювге яшёрюмлени иштагьландырывда шайлы къошум этип тургъан. Бугюнлерде Тамазатёбе юртда ону эсделигине багъышланып спортну волейбол журасындан район ярышлар оьтгерилгени де шону герти кюйде исбатлады.
Оьтгерилген шо ярышлар Бабаюрт районгъа гиреген бары да дегенлей юртлардан спортчулар къуршалгъан командаланы жыйды деп айтмагъа ярай.
Инг алда Тамазатёбе юртну гьакимбашы Магьач Имангьажиев ярышларда ортакъчылыкъ этеген спортчулагъа уьстюнлюклер ёрап, Н. Шугьайыбовну яшав ва загьмат ёлу булан жыйылгъанланы таныш этди. Шондан сонг чыгъып сёйлеген Бабаюрт районну администрациясыны спортгъа ва яшёрюмлени ишлерине къарайгъан комитетини ёлбашчысы Илмитдин Абдуразакъов да шу ёрукъда оьтгерилеген ярышлар торайып гелеген наслуну вакиллерин спортну гьар тюрлю журалары булан иштагьландырывгъа къуллукъ этегени гьакъда эсгерди.
Сав гюнню узагъында командалар бир-бири булан ойнап, оьзлени арасында алдынлыланы арагъа чыгъарды. Ачыкълашдырып айтгъанда, биринчи ерни Татаюртну командасы къазанды. Экинчи ерге Тамазатёбе юртну командасы лайыкълы болду. Уьчюнчю ерни буса Новая Коса юртну командасы алды. Ярышланы алдынлыларына кубоклар, медаллар ва багьалы савгъатлар тапшурулду.
Чинкдеси, ярышларда ортакъчылыкъ этген командалар оьзлени бажарывлугъуна, сынавуна гёре сыкълашгъан оюнну гёрсетди. Оюнлардан лезет алып тургъан къаравчуланы гёнгюн ачды. Шо ярышланы къурумлу оьтгермек учун Бабаюрт районну спортгъа ва яшёрюмлени ишлерине къарайгъан комитетинден, олай да Тамазатёбе юртну администрациясындан къайры да, Н. Шугьайыбовну уланлары Завур, Камил ва Мурзабек айрыча къошумун болдургъанын эсгермеге тюше.
Бэлла Гьажигелдиева, Россияны журналистлерини
союзуну члени.
