Сорав – жавап
– Бу йылны май байрамларында нече гюн ял алабыз? Бирлери 10-нчу май болгъанча деп айта…
– Май айда къысгъа жумалар 2 керен болажакъ. Ишлейгенлер апрель айны 29-30-нда ва 1-нчи майда ял алажакъ, артындагъы жума буса – 6-нчы майдан башлап, 4 гюн уьйде туражакъ. 10-нчу май – ишлейген гюн.
* * *
– Къуругъан отланы ягъып, сонгунда от тюшсе, уллу оьлчевдеги къоду салынажакъ деп айта. Шону гьакъында толу кюйде билме яраймы?
– Къуругъан япыракъланы ва отну шагьарда, юртларда яллатма ярамайгъаныны биринчи себеби – ону адамлагъа этилеген заралы. От ярты сёнюп, ташлангъан сигаретден, якъгъан отгъа тергев этилмейгенни себебинден савлай юртлар яллап къалмакълыкъ бар. От якъгъан ерде 5–6 йыл бир зат да оьсмей. Эгер де авлакъланы тазаламакъ учун от ягъылса, шону да заралы бар. От яллай туруп, сагьатда 5 чакъырым ёл ала. Эгер де ел чыкъса, чалтлыгъы 5 керен арта.
Аз-маз отланы сув, къайыр яда топуракъ ташлап сёндюрме бола, эгер де ялын артып бара буса, 112 яда 101 номерлеге сёйлеме герек.
От якъгъан адамлагъа гёрсетилген къоду да бар: айрыча адам якъгъан буса – 5-15 минг манат. Эгер де хозяйство агъачлыкъгъа ювукъда от якъса, 200-500 минг манат бола.
* * *
– Машин токътайгъан ерлерде сакъатлагъа да ерлер гёрсетилген. Шонда аслу гьалда гьайдавчусу сакъат экенни билдиреген белгиси бар машинлер салына. Тек биле де туруп шо ерлеге башгъалар да сала. Закон булан шогъар нечик къарала?
–Закон булан машин токътайгъан ерлени 10 проценти сакъатлар учун гёрсетилме герек. Шо ерлер хас белги ва сурат булан белгилене. Эгер де шо ерге сакъат тюгюл адам салса, шо машинни алып гете ва къоду этилеген ерге сала.
Машинни шишасына сакъатлыкъны белгилейген кагъыз ябушдурулгъан булан болмай, шо Интернетден тергегенде чыгъар кюйде «Госуслуги» порталдан федерал реестргъа гирме герек.
Эгер де сакъатлагъа белгиленген ерге машин салынса, шогъар 5 минг манатгъа къоду салма бола.
* * *
– Гьали паспортну алып юрюмесе де ярай деп айта, шо тюзмю?
– Бара-бара адамлар документлерин алып юрюмесе де яражакъ. Гьар адамны гьакъында Интернетден билме болагъан къайдалар яшавгъа чыгъып тура. Дагъы къайсы ерлерде цифровой документлени къоллама ярайгъанын Россияны Гьукуматы токъташдыражакъ.
* * *
– «Ветеран труда» деген атны не пайдасы бар ва шо шагьатнама кимлеге бериле?
–Загьматны ветеранларына тюрлю-тюрлю енгилликлер болдурула. Шолар федерал оьлчевде гёрсетилсе де, гьар регион оьзюню даражасында тёлей.
Енгилликлени гьакъында айтса, гьар айда берилеген акъча бар. Шолай да, пособие гёрсетиле, яшавлукъ уьйлер бермеге бола, бир-бир налоглардан азат этиле ва медицина кёмеклер гьавайын болдурула.
«Ветеран труда» деген шагьатнаманы алмакъ учун бир ерде таймай 15 йыл ишлеме герек ва эргишилени – 25, къатынгишилени 20 йыл стажы болма тюше. Шону булан бирге федерал даражадагъы савгъаты да болма герек.
Къайсы савгъатлагъа берилегенни шу сайтдан билме бола: https://kolesovgb.ru/index.php/
