Атеросклероз аврувгъа тарыгъанлар

Атеросклероз аврувгъа тарыгъанлар

         Атеросклероз деген авруву барланы къантамурлары тар болуп, къан тийишли кюйде айланып болмай. Натижада, къантамурлар тыгъылып, юрекге яда башмайгъа къан яйылма бола. Атеросклероз аврув аз тербенеген, семиз, ичеген ва сигарет тартагъан адамлагъа кёп къабуна. Гьава нас, сонг да адамланы таза гьавагъа чыгъып къыдырма чоласы ёкълугъу, ашамлыкъны сан яны осал, яшавда къайнашма тюшеген гезиклер кёп болагъаны да юрекге яман таъсир эте. Шогъар кёмек этме болагъан дарманны таклиф этебиз. Дарманланы аслу яны ябушгъанны чечеги ва емишлеринден гьазирлене.


4 ашкъашыкъ ябушгъанны чечегине 200 мл. спирт тёгюп, 3 жума башын ябып къоя. Сонг сюзюп, шону ашдан алда 1 чай къашыкъны иче. Ону сув къошуп ичсе яхшы.


1 стакан янгы жыйылгъан ябушгъанны агъач къашыкъ булан янчып, уьстюне 200 мл. спирт тёгюп, 3 жума къоя. Сонг шону сюзюп алып, ашны алдында гьар гезик сув булан 1 чай къашыкъны ичигиз.


Ябушгъанны емишинден 20 гр. алып (къуругьаны да ярай), уьстюне бир стакан къайнайгьан сув да тёгюп, аста яллайгъан отда 5 минут къайната. Гьар ашыгъызны алдында, юхлама ятгъанча, 200 мл. шону сувун ичме тюше.


1 стакан ябушгъанны емишине 500 мл. къайнагъан сув тёгюп, 2 ашкъашыкъ шекер де къошуп, юваш яллайгъан отда ярты бишгенче къайната. Сонг сюзмей, емиши, суву булан холодильникде сакълай. Ашагъанча 1 ашкъашыкъны, гече ятгъанча 2 ашкъашыкъны къоллама герек.


    Уьстде эсгерилген дарманлар къара ябушгъандан этиле. Гьали ону къызыл тюслюсю гьакъда айтайыкъ.


    Ону емишлери де савлукъ учун бек пайдалы. Бир стакан емишни агъач къашыкъ булан янчып, 100 мл. сув тёгюп, 40 градус иссилик болгъанча исите. Сонг яхшы кюйде сыгъып, гюнде уьч керен ашны алдында 1 ашкъашыкъны къоллай. Бу этме тынч дарман юрекни жымчыкъ этлерин къарт болма къоймай.


Савлугъугъузну беклешдирмек учун сизге ябушгъандан къайры, оьзге оьсюмлюклер де тарыкъ.


Гречиханы чечеклеринден 1 ашкъашыкъны алып, 0,5 л. къайнайгъан сув тёгюп, термосда 2 сагьат къоясыз, сонг сюзесиз. Гюнде 0,5 стакан сувун 3-4 керен ичме тарыкъ.


Бакъаяпыракъны къуругъанын увакъ этип, шондан 1 ашкъашыкъны аласыз, шону уьстюне 1 стакан къайнагъан сув къошасыз. Шону 10 минут къоясыз. Шо гьазирлеген   сувну ашагъанча бир сагьат алда ичме тюше.


Бакъаяпыракъны уллу япыракъларын яхшы кюйде жувуп, увакъ этип туврайсыз. Сонг сувун сыгъып аласыз, шончакъы бал да къошуп, 20 минут къайнатасыз (отну аз этме герек). Шону да башы бек ябылгъан шиша савутда къарангы ерде сакълама тюше. Гюнде 2-3 аш къашыкъны къоллама герек.


5 гр. гийиготну алып, шогъар 50 мл. къайнайгъан сув тёгюп, 40 минут термосда къоясыз. Шондан жумада 2-3 керен 1 ашкъашыкъны ичсе, баш аврувгъа кёмек эте.


 

Самурсакъны пайдасы

 

    Самурсакъны ашамагъан адам дюньяда ёкъдур.


   Бырынгъы Египетде самурсакъны тумав, тиш, вабаъ аврувлагъа къаршы дарман гьисапда къоллап юрюгенлер. Египетни халкъы чы согъанны, самурсакъны аты булан ант да эте болгъан.


   Индияны ва Кавказны халкълары самурсакъны сигьрулу гючю бар деп инангъанлар, шо саялы да гьайлы аналар самурсакъны бир тишин чюпюрекге чырмап, гьайкелни орнуна яшланы бойнуна тагъагъан гезиклер кёп болгъан.


   Бырынгъы Римде асгерлер, къоччакълыгъы артсын учун, давну алдында самурсакъ тишлер чайнай болгъанлар.


   Англияда гьали де хоразланы ябушувлары юрюле. Шо оюнда англаву барлар токъташдырагъан кюйде, самурсакъ чокъугъан хораз яхшы ябуша ва уьстюн де геле.


   Алимлер айтагъангъа гёре, илмуда белгили бактериялар самурсакъны гючюне къаршы турмагъа болмай. Адам уллу болгъан сайын, ону къантамурларыны тамларына тюрлю тузлар ябушмагъа башлай. Шо заман къантамурлар къата, алдын йимик ишлемей. Шо буса –атеросклерозну, демек, къартлыкъны аламаты. Къанны ташыву гётерилегенине де кёбюсю гьалда шо себеп бола.


Самурсакъны тазалап, уьстюне спирт де тёгюп, бир нечакъы замангъа къоюп ичсе, шо къантамурланы ичиндеги зараллы тузланы иритип йибере.



Баш аврувдан къыйналагъанлагъа


Кёплени чакъ-чакъда баш аврувлар инжитмей къоймайдыр. Шону учун сизге насигьат гьисапда шулай ёрав этебиз.


Он–он беш лавр япыракъны аласыз, шогъар бир литр сув тёгюп, 5-7 минут къайнатасыз. Сонг шону беш минут къоюп, артда буса ону пусуна тынышыгъызны аласыз, бир-эки керен сувун уртлама да ярай.


 

Овошланы, емишлени пайдасы


Биз гьаман къоллайгъан чита къанны гёзге геливюн артдырагъанны ва шолайлыкъда гёрегенликни яхшылашдырагъаны белгили болгъан.


Юзюмню Пайхаммарыбыз (а.с.) ажайып кёп сюе болгъан. Шо сыйлы емиш къанны, бюйреклени ва базыкъ ичекни тазалай, адамны къаркъарасына гюч бере ва савлукъну беклешдире.


Хурмасы болмагъан уьй, Пайхаммарыбыз (а. с.) айтгъан кюйде, азыкъсыз ожакъ йимикдир. Ол хурманы къатынгишилер яш табагъанда ашаса яхшы деп белгилеген.


Къозаш башмайгъа парх берегенни эслегенсиздир. Гьатта къозашны бюрюшмелери ва бюкмелери де башмайны уьст къатлавуна ошай. Къоз отуздан да артыкъ нерва клетканы оьсме кёмек этегени ва башмайны ишин яхшылашдырагъаны ачыкъ болгъан.


Бурчакъ да адамны бюйреклерине ошай. Шо саялы буса да ким биле, бурчакъ бюйреклени ишлевюне бек таъсир эте, къолайлашдыра.


 

Къаны ташыйгъанлагъа


Гьар гюн эртен ашагъанча ярым сагьат алда 50-100 грам кабахурма ашасагъыз, къаны ташыйгъанлагъа дарман болур. Шону уьч жума къоллайсыз, сонг 10 гюн танапус этип, янгыдан узатма боласыз. Бу дарманны бир янына тергев этме герек. Шону шекери гётерилгенлеге яратмай.