1941-нчи йылда Ватан дав башлангъанда, давгъа юртдан 750 адам гетген. Ватан учунгъу ябушувларда болуп яраланып, сакъатланып юртгъа 150 эндирейли къайтгъан, оьлгенлени санаву 413-ге етишген, 187 адам буса белгисиз ёкъ болгъан.
Мени булан узакъ йыллар муаллим болуп Уллу Ватан давну ортакъчылары Гьайбулла Абдуллаевич Бийболатов ва Шагьболат Бийболатович Индырчиев ишлеген. Бугюнлерде юртда сав янгыз Шагьболат Бийболатович Индырчиев яшай. Дюньядан гетгенлерин Аллагь рагьмат этсин, жанлары женнетлерде болсун!
Ш.Индырчиев 1923-нчю йылда Эндирей юртда тувгъан ва юрт школаны битдирген. 1941-нчи йылда душмангъа къаршы ябушмагъа сююп давгъа гетген. Ол, яраланып, узакъ заманлар госпиталларда ятып, къолай болуп, 1947-нчи йылда уьюне къайтгъан. Сонггъу йыллар колхозда ишлеген. 1961-нчи йылда Индырчиев ДГУ-ну филология факультетине заочно охума тюшген. 1963-нчю йылдан тутуп, 1990-нчы йылгъа ерли юрт школада къумукъ тиллерден дарслар берип ишлеген. Буссагьат Уллу Ватан давну ортакъчысы пенсияда ял ала.
Гьар йыл 9 майда, Уьстюнлюкню гюнюнде, охувчу яшлар, муаллимлер ону гёрмеге, хабарлама янына барып, ёлугъувлар оьтгерелер. Оьзюне 91 йыл болагъанына да къарамайлы, яшавунда болгъан ишлени айтып бола. Тек ол къыргъа чыгъып юрюмей. Арт вакътиде гёзлери гёрмейген болуп къалгъан.
Бизин пачалыгъыбыз бу йыл Уллу Уьстюнлюкню 69 йыллыгъын белгилей. Биз, муаллимлер, охувчулар, юртлулар Шагьболат Бийболатовични шо уллу байрам булан къутлап, огъар яхшы савлукъ ва узакъ оьмюр ёрайбыз!
Ёкъ болсун дав!
Бизге тарыкъ парахат яшав!
Къ. Къочкъарова,
Эндирейдеги 1 номерли
орта школаны профкомуну
председатели.
СУРАТДА: Ш. Индырчиев.
