Къызыл Байракъ орденсиз къалгъан игит

Бабаюртлу улан, капитан Гьамзат Гьажиевге де Тенгирибиз шолай бай къысматны савгъат этген. Терский областны Хасавюрт участкасыны Бабаюртунда 1911-нчи йылда тувгъан Гьамзат Гьажиев ата юртундагъы етти йыллыкъ школаны битдирген. Давну алдындагъы йыллардан башлап, Гьамзат Гьажиев Ватанына къуллукъ эте. Ол оьзюню загьмат ёлун да районну ич ишлер бёлюгюнде участка инспектор гьисапда башлай. Сонггъа таба сельхозбанкны баш инспектору, ВЛКСМ-ни райкомуну тарбиялавгъа къарайгъан секретарыны орунбасары, артда буса биринчи секретары болуп чалыша. 1940 — 1941-нчи йылны июль айы болгъанча ол пропагандист ишни де юрюте. Шо буса ону гележегинде аслу ерни тута.

Уллу Ватан дав башлангъанча да Гьамзат Гьажиевни яшавгъа къараву токъташгъанлыгъы, халкъ булан идеология ишни юрютмеге сынав топлагъаны, яшёрюмлер булан иш гёрмеге бажарагъанлыгъы Уллу Ватан давну йылларында бек тарыкъ бола. Немис елевчюлер оьзлени къара гючюн совет уьлкебизге бакъдыргъанда буса, Гьамзат Гьажиев – герти коммунист гьисапда биринчилерден болуп гёнгюллю кюйде райондан фронтгъа гетгенлени бири.

Давну биринчи йылларында болгъан къыргъынлар кёплени юрегине таймас дамгъа салгъан. Гьар шагьар, гьар юрт, гьар отар учун юрюлген давларда капитан Гьамзат Гьажиев де актив кюйде ортакъчылыкъ эте. Амма 1942-нчи йылда Новороссийск шагьар учун юрюлген гючлю давда немис елевчюлени намарт гюллеси Гьамзат Гьажиевни де яралай ва ол Ставрополь шагьарында ерлешген госпитальгъа тюше. Тек Ватанына къопгъан къыйынлы гюнлерде ол оьзюне ер тапмагьа болмай, оьзюн фронтгъа йибермекни тилей. Ону савлугъуна гёре, ол гьазирлиги булангъы политработник экенин де гьисапгъа алып, командование Гьамзат Гьажиевни Горький шагьарда ерлешген Къызыл Армияны баш политуправлениесини резерв бёлюгюне йибермекни пайдалы гёре. Тек душман булан бетге-бет ябушмагъа гьасирет экенге, ол тилеп, 1942-нчи йылны ахырында гене фронтгъа гете.

Госпитальдан сонг Гьамзат Гьажиевни душман булангъы биринчи урушу Ленинградны боюнда бола. 900 гюн ва гече дёрт де янындан немислер къуршавгъа алгъан шагьарлылар булан янаша бабаюртлу улан, Совет Армияны капитаны Гьамзат Гьажиев де Ленинградны фашист елевчюлерден эркин этмек учун ябуша. Шагьарда къопгъан ачлыкъгъа да, къыргъынгъа да къарамай, яш коммунист къамавгъа алынгъан Ленинградны немислерден тазалавда ва оланы дагъытывда къоччакълыкъ гёрсете. Ленинград шагьар учун юрюлген давда гёрсетген къоччакълыгъы учун Оьр командование капитан Гьамзат Гьажиевни «Ленинградны якълаву учун» ва «Къоччакълыгъы учун» деген медаллар булан савгъатлай.

Амма бир уьстюнлюк булан дав битмей. Оьзге комсомоллар ва коммунистлер булан бирге, Ватаныбызны толу кюйде елевчюлерден эркин этмей туруп, ябушувну токътатмажакъгъа ант этген капитан Гь. Гьажиев 1944-нчю йылны январ айында бырынгъы шагьар Новгородну фашистлерден азат этивде де актив кюйде ортакъчылыкъ эте. Янгы урушлар, янгы уьстюнлюк­лер.

Ондагъы патриот ругь ва къоччакълыкъ ярасы булан ябушма да гюч бере ва 1944-нчю йылны ахырында толу кюйде сав болгъан капитан Гь. Гьажиев 21-нчи армияны политотрядына бакъдырыла. Шо вакъти Совет Армия Польшаны ва Литваны янындан фашист Германияны топурагъына чыкъмакъ учун гьазирлик гёре. Армияны командующийи А. А. Говоровну, военный советни члени А. А. Ждановну ва штабны начальниги Д. Н. Гусевни ёлбашчылыгъы булан капитан Гь. Гьажиев 21-нчи армияны политика-англатыв иш юрютеген бёлюкню баш къуллукъчусу болуп токътай. Эсгерилген армияны политика бёлюгю гьар урушну алдында солдатлар булан ачыкъ лакъыр, англатыв ишлер юрютмеге, оланы патриот ругьун гётермеге къаст эте. Чапгъын башлангъанда буса капитан Гь. Гьажиев солдатланы алдына тюшюп ябушувгъа бара.

Къоркъув билмейген яш коммунист, Совет Армияны капитаны Гьамзат Гьажиевни Ватаны тергевсюз къоймай. Уллу Ватан давну ол дивизияны начальнигини политика бёлюгюне къарайгъан орунбасары гьисапда тамамлай. Давну боюнда капитан Гьамзат Гьажиев кёп керенлер савгъатлана. Ону тёшюн Ватан давну 2-нчи даражалы ордени, «Къоччакълыгъы учун», «Ленинградны якъла­гъаны учун», «Берлинни алгъаны учун», «Кавказны якълагъаны учун», «Уллу Ватан давда фашист Германиядан уьс­тюн гелгени учун» деген медаллар безей. Оьр командованиени атындан огъар бир нече баракалла кагъызлар, онлар булангъы грамоталар бериле.

Капитан Гьамзат Гьажиевни атына гелген баракалла кагъызланы бирисинде булай сёзлер бар:

«Уллу Ватан давну ортакъчысы капитан Гь. Гьажиев немислени промышленный районуну центры Гитденбург шагьарны алмакъ муратда оьтгерилген давда гёрсетген къоччакълыгъы ва дав этмеге гьюнери бар учун, Оьрбашкомандующий ёлдаш Сталинни 257-нчи буйругъу булан сизге, шо урушну ортакъчысына, баракалла билдириле.

Асгер бёлюкню командири КОРШУНОВ».

Уллу Ватан давдан капитан Гьамзат Гьажиев ата юрту Бабаюртгъа 1946-нчы йылны апрель айында къайта ва ону КПСС-ни райкомуна ишге алалар.

Тюрлю-тюрлю йылларда ол КПСС-ни райкомунда инструктор, кадрлагъа къарайгъан секретар, Ново — Надежда МЖС-ни ёлбашчысыны политика бёлюгюне къарайгъан орунбасары, районну гьар тюрлю хозяйстволарында парткомларыны ёлбашчысы гьисапда чалышгъан.

«Дагъыстан» совхозну парткомуну секретарындан ол 1972-нчи йылда пенсиягъа да чыгъа. Гьамзат Гьажиевни пачалыкъны, халкъны алдында къазангъан ярыкъ келпети, замандашларыны эсинде къоркъув билмейген солдат ва жамиятны лайыкълы ватандашы гьисапда сакъланажакъгъа шеклик ёкъ.

Герейхан Гьажиев,

хас мухбирибиз.
Авторизация
*
*
Регистрация
*
*
*
Согласны с условиями сайта?
Генерация пароля