Булай да, бир-бир муниципал къурулувларыны гьакимбашчыларын бютюн халкъ сайлавланы барышында белгилемейгени он йыллар да бола. Дагъыстан учун шо бирдокъда адатдан тышгъа чыгъагъан гьал гьисапланмай.
Бютюнхалкъ сайлавланы сынаву гёрсетегени йимик, дагъыстанлылар тувра тавуш беривню имканлыкълары булан пайдаланып билмеген. Кёбюсю гезиклерде шо политика агьвалат бизин республиканы районларында ва шагьарларында халкъны арасында татывсузлукъну тувулунувуна себеп болуп токътагъан. Халкъны гьалек болувуна, натижада республикадагъы булай да бузукъ жамият- политика гьалны къыставуллу болувуна элтген.
Бугюнлеге ерли бизин республикада да, савлай уьлкеде де политика гьалланы ёругъу бир-бирде оьзге тыш пачалыкъланыкине етишмей буса ярай. Политика гючлер оьзлени алдына янгыз оьзлени башына, тухум-тайпасына, дос-къардашына пайдалы масъалалаланы салып, жамиятны гьакъында буса толу жаваплыкъ булан ойлашмагъан деп айтмагъа да ярай. Бизин республикадагъы бир-бир шагьарланы ва районланы муниципал къурулувларыны администрацияларында жаваплы къуллукъланы гьакимбашчыны лап ювукъ къардаш адамлары елегенин гьисапгъа алса, оьрде айтылгъан пикруну дуруслугъуна шекленме де тюшмейдир деп эсиме геле.
Дагъыстанны гьар къайсы шагьарында да, районунда да артдагъы йылларда гьакимлик къуллукълагъа талпынагъанлары кёп ёлугъа. Депутатлар гьисапда бир-бир акъчасы кёп айтылгъан урушбатчылар, не де жинаятчылар сайлана. Нечик де, депутат ерлер кёбюсю гезиклерде гьар тюрлю даражадагъы гьакимлени кабинетлеринде пайланып къала. Сайлавланы вакътисинде тавуш беривге салынагъанлар да оьзлени бирден халкъны къыйынын-тынчын англайгъандай гёрсетмеге сюелер. Дёрт йылны узагъында буса оьзлени сайлагъанланы ихтиярларын якълавдан башкъачырып юрюй. Шо буса эсгерилген гьакимлик къурумларына баргъан сайын инамсызлыкъ тувдурувгъа себеп болуп токътай. Шолайлыкъда, депутатлар этилип сайланмагъа лайыкълылар ягъада къалып къала.
Шолай болса да, бизин арабызда районланы ва шагьарланы гьакимбашчыларыны бютюн халкъ сайлавларын гери уруп, демократияны бузабыз деп айтмагъа сюегенлер де ёлугъа.
Демократияны шартларын савлай дагъыстан жамиятына, айрыча гьар адамгъа бакъгъан якъда да сакъламагъа тарыкъдыр. Бизин республикада демократияны гьакъында бош сёзлени айтып турмайлы, шогъар харжланагъан гючню-къуватны асувлу ишге харжласа пайдалы болмасмы эди экен?
Насрулла Байболатов.
