Гьюрметли охувчулар!
Газетибизни бу йылгъы элли экинчи ахырынчы номерини чыкъмакълыгъы булан бирдагъы бир загьматлы, къуванчлары, сагъышлары булан къатыш йылыбыз тарихге гете деме ярай. Бу йылыбызгъа байлавлу не йимик гьасиллер чыгъарма болабыз? Биринчи гьасилибиз бу эсги йыл булан савболлашыв сёзюбюзде ачыкъ этилген. Денгиз сюрмедик демек, йыл бою биз халкъыбызгъа бир пайдасыз, таъсирсиз ишни этип турмадыкъ демек бола. Неге тюгюл де, денгизни сюрген булан пайда болмай,сабан харш къалмай…
Билесиз, миллетни инг уллу байлыгъы, ругь маясы, оьзюне бакъгъан якъдагъы менлиги инанчыдыр, къастыдыр. Газет деген маълумат къурал да ону милли ругьуну бир савутудур.
Биз, газетни чыгъарагъанлар, йыл бою муна шо савутну къоллап сизин учун Дагъыстанны, Россияны халкъларыны яшавуну гьар тармагъындан маълумат берип, жамият арада тындырыкълы пикру яратма къаст этип чалышдыкъ. Озокъда, бу ишни биз не даражада бажаргъаныбызгъа сиз къыймат берерсиз. Биз оьзюбюз де оьз ишибизге танкъыт гёзден янашабыз.
Этилген ишлерибиз, алынгъан ёлубуз ва къазанылгъан даражаларыбыз ачыкъ. Буса да бу гезикде де бир-бир къолда этилген чараланы гёзден гечирип къарасакъ дурус болур.
Оьзге газетлер булан тенглешдиргенде, «Ёлдашны» маълумат тармакъда этген иши, къазангъан пикир оьсдюрюв, билим яйыв даражасын бирев де яшырып болмай.
Бу йылны ичинде де газетибизни ери ва ролю маълумат дюньясында, оьзге милли газетлени арасында бирден-бир мекенлешдирилди,ону аудиториясы дюнья оьлчевюнде генглешди. Бу иш де, озокъда, янгы инфотехнологияланы къоллайгъан «Ёлдаш.ру» дейген оьз сайтыбыз чалыша башлагъанлыгъы булан байлавлу. Дагъыстанда чыгъагъан милли газетлени сайтларыны арасында бизинки инг алдынлысы болуп танылгъанын да эсгерейик. Ону аудиториясы да газетни кагъыз версиясындан бугюнокъ да, кёп болса тюгюл, аз тюгюл. Демек, биз гьар заманда да иш булан машгъулбуз. Эсги гьакъыллар булан янгы ёллар алынмайгъанны да оьзгелерден эсе яхшы билебиз. Биз ишлейбиз!
Газет пачалыкъ газет буса да, биревлер айтма гьитинеген кюйде, бир пачаны газети тюгюл, республиканы къургъан, бу Дагъыстан пачалыкъны къурмакъ ва якъламакъ учун инкъылап гьаракатларда, къанлы давларда, загьмат фронтларда хыйлы-хыйлы оьз уланларын аямай-асырамай къурбан этген къумукъ халкъны газети.
Бугюнде де гьукуматгъа загьмат тёгюп къазангъан загьмат къазанчларындан налоглар берип бу газетни оьз маясын болдургъан да шо халкъдыр. Газет халкъыбызны гёзю, къулагъы ва халкъ пикрусуну къуралыдыр. Ва шу къайдалы ишлеге де есдир.
Охувчуларыбыз яхшы биле йыл боюнда газетни тергевюнден Дагъыстанны ва Россияны политика, экономика ва оьзге тюрлю масъалалары, дюнья гьаллары таймады, халкъыбызны юрегинде таш-тююн болуп турагъан Таргъу, Къараман, тил, маданият, топуракъ масъалалар, тарих туташ ер алды. Унутулгъан уланларыбызны, къызларыбызны халкъыбызгъа къайтардыкъ, олар булан таныш этдик. Биринчи дюнья давуну унутулгъан игитлерини атларын янгыдан эсге алдыкъ. Халкъыбызны яшавунда болгъан бир гёрмекли агьвалатдан да арек турмадыкъ.
Мурат Аджини, Барият Муратованы, Анвар Гьажиевни юбилейлеринде къайратлы кюйде ортакъчылыкъ этдик, олагъа байлавлу охувчуларыбызны юреклеринде гьислерин тувдурдукъ, эсин уятдыкъ, дурус, тийишли пикруларын болдурдукъ.
Халкъара байлавлукъларыбызны сакъладыкъ, беклешдирдик. Тюркия пачалыгъыны «Анадолу» деген маълумат агентлиги булан бу тармакъда пайлашып ишлежекге дыгъар байладыкъ. Буланы имканлыкъларын къоллап, халкъыбызны дюньягъа танытмакъ учун абатлар алдыкъ.
Бу йыл май айда Тюркияны Эсгишегьиринде биринчилей оьтгерилген Тюрк Дюньясы китап къурултайында делегация болуп ортакъчылыкъ этдик, къумукъча ва русча къумукъланы гьакъындагъы 60 китап булан таныш этдик, артда да о китапланы барын да Эсгишегьирни беледиясыны (мериясыны) китапханасына савгъат этип тапшурдукъ. Шо гюнлени ичинде мен де, шаирибиз Бадрутдин де Истанбулгъа оьзгелер булан бирче чакъырылып барып, Тюркияны о замангъы премьер-министри Режеп Тайип Эрдогъанны (гьали ол Тюркияны Жумухурбашканы, Президенти) ондагъы резиденциясында къонакълыкъда болдукъ. Янгы къурулгъан «Дагъыстан» деген китапуьйню (Издательский дом) ёлбашчысы, ювугъубуз ва сапар ёлдашыбыз Умар-Осман Гьажиев буса, Анкарагъа гетип, Тюркияда дюнья оьлчевюнде иш гёреген китапуьюню (яйынэви) иши булан таныш болду, бир-бири булан байлавукълар юрютежекге сёйлешдилер.
Бу йылны ноябр айында Темиркъазыкъ Кыбрыс (Кипр) Тюрк Жумхуриятында (республика) Гирне шагьарда Тюрк Дюньясыны тюрк тиллерде чыгъагъан маълумат къуралларыны ёлбашчыларыны 4-нчю Медиафоруму оьтгерилди. Онда да магъа ва газетибизде чалышагъан Рашит Гьаруновгъа ортакъчылыкъ этмеге имкан болду.
Озокъда, йылыбыз янгыз ругьубузну оьр этеген, кюр этеген агьвалатлар булан оьтюп къалмады. Юрегибизни ачытдыргъан, юреклерибизге къайгъы болуп синген авур тас этивлерибиз де болду. Халкъыбызны «менмен» деген милли ругьлу уланы, иш ёлдашыбыз ва гьакъ герти сырдашыбыз Интернетде башындан берли бизин булан бирче «Кумыкский мир» деген сайтыбызны къургъан ва о ишге савлай берилип, гечесин-гюнюн багъышлап чалышып тургъан Садрутдин Адилов, аз авруп, чакъсыз бизден айрылды (жаны женнетлерде болсун!). Оьзю гетсе де, ону халкъы учун, газет учун этген ишлери, гёрсетген къайратлы асил гьаракаты унутулмай ва унутулмажакъ. «Къумукъ Дюнья» интернет сайтыбыз яшай ва яшажакъ!
Сёзюмню тамамлай туруп, дагъы да айтма сюемен. Газет деген маълумат къурал, биз миллетбиз, миллетче яшайбыз, яшама да сюебиз деген оьз ругьлу, оьз хыяллы халкъны савутудур. О огъар ону тюнегюню булан бугюнюн мекенли англатып, гележегинден хабар береген алатыдыр. Газетчилер («ёлдашчылар») шону яхшы теренден англай геле ва муна 97 йылдыр шо борчну кюте ва давам да этежеклер.
Янгыз къарнын токъ этмеге чалышагъан халкъдан миллет болмай; миллет болма яда миллет кююнде даимге яшама сюеген халкъ жанын токъ этеген жан азыгъыны гьайын этмеге борчлу. Ач буса да, токъ буса да, миллетни ругьдан тюшме къоймайгъан одур!
Янгы йылда да биз сизин буланбыз! Сиз де бизин булан энниден сонг да болугъуз!
Карамат – Аллагьдандыр, бизден буса сабур, чыдамлы ва давамлы гьаракат герекдир!.
К. АЛИЕВ.
