23-нчю майдан 25-и болгъанча Каспийск шагьарда жынслы къойланы ва эчкилени россия оьлчевдеги выставкасы оьтгерилежек. 24-нчю керен оьтгерилеген шо чара уьлкеде инг де кёп мал сакъланагъан Дагъыстанда, «Анжи-аренаны» майданында арты артындан экинчи гезик юрюле.

Выставкада Россияны 34 регионундан гелген 80 алдынлы гьисапланагъан жынслы хозяйстволаны 450 малына къарап къыймат берме имканлыкъ бар. Выставкада Запорожск областдан гелгенлер де бар. Мунда гьар регионда къойчулукъну иши нечик салынгъаны гьакъда сынав алышдырывлардан къайры, дыгъарлар этив, малларын сатыв масъалалагъа да къаралажакъ.

Выставкада Россияны къойчулукъ союзуну президенти, Россияны илмулар академиясыны академиги Харон Амерханов ва Россияны юрт хозяйство министрини орнунбасары Максим Увайдов, Россияны промышленностуну ва сатыв-алыв министрини орнунбасары  Олег Бочаров ортакъчылыкъ этелер. Оланы къаршылагъан Дагъыстанны Гьукуматыны Председатели Абдулмуслим Абдулмуслимов маллар ерлешген ерлерден айланып чыкъдылар. Маллардан къайры выставкада тюелеге, атлагъа, гамишлеге, гьатта эшеклеге де  къарама бола.

А.Абдулмуслимов выс­тавканы ача туруп жыйыл­гъанланы Дагъыстанны Башчысы С.Меликовну атындан къутлады ва Дагъыстан аграр респуб­лика, къойчулукъ буса юз йыллар булан аслу тармакъ болуп гелгенни айтды.

– Арты артындан эки йыл выставканы Дагъыс­танда оьтгерегенни де маънасы бардыр, рес­публика уьлкеде мал сакълавдан алдынлы ерде, — деди ол. –Бизин республиканы къойчуларына тышдан гелгенлеге уьйретме зат бар. Биз оьзю­бюзню къой эт булан таъмин этип чи нечик де, гьатта башгъа пачалыкълагъа да йиберебиз.

Выставкада бай маданият программа юрюле, шолай да ортакъчылыкъ этегенлер тюрлю-тюрлю миллетлени халкъ саниятына, милли майданчаларына къарама да бола.

Выставка юрюлген кюйню гьакъында газетни гелеген номеринде толу маълумат берилежек.

 

Бизин мухбирибиз.