Журналистлер булан ёлукъду

Оьтген талатгюн, март айны 1-нде, Дагъыстанны Гьукуматыны Председатели Абдулмуслим Абдулмуслимов Магьачкъала шагьарда  М. Гусаевни атындагъы редакция-басмахана комплексинде болду.  Шо иш сапарыны барышында олоьзюню заместители Ризван Къазимагьамматов  ва ДР-ни мал-мюлкге къарайгъан министерлигини ёлбашчысы Завур Эминов булан бирче гелди.

Бизин республика оьлчевде милли  ва орус тиллерде чыгъарылагъан газетлени мухбирлери ва ёлбашчылары булан оьтген шо ёлугъувну барышында эсгерилген тармакъда артгъа салмай чечме тюшеген масъалалар арагъа салынып ойлашылды. Шону булан бирге маълумат къуралларында торайып гелеген яш наслуну элине бакъгъан якъдагъы  патриот гьислени тарбиялавгъа артыкъ тергев бермеге тюшегени гьакъда айтылды. Журналистлени гьакимлик къурумларыны жаваплы къуллукъчулары булан къатнавуну масъаласына да къаралды. 

Бизин республикада иш гёреген маълумат къураллар  къолда бар бары да имканлыкъланы къоллап, асувлу иш юрютегенин ташдыра туруп, Абдулмуслим Абдулмуслимов бугюнлерде шо тармакъны ишине  бакъгъан якъда берилеген агьамиятны артдырмагъа тюшегенин де эсгерди.  Бизин республикадагъы маълумат къуралланы ишин камиллешдиривню масъаласы гележекде янгы къурулгъан Дагъыстанны печатгъа ва информациягъа къарайгъан агентлигини алдына салынагъан аслу масъала болуп токътайгъаны гьакъда билдирди.

Шондан къайры да, ол гьар къайсы маълумат къурал да гележекде оьзюню  оьсювюн гёз алгъа тутуп, гьаракатын болдурмагъа тюшегени гьакъда да айтды. Милли тиллени айланасында бугюнлерде тувулунгъан гьал оьзюн ойлашдырагъаны гьакъда айта туруп, премьер-министр гьар ким инг алда ана тилин, оьзюню халкъыны тарихин билмеге тюшегени гьакъда да айтды.  

Шондан сонг ол жыйылгъанланы  газетлени ва журналланы редакцияланы янгы техника къураллар булан ясандырывну къолайлашдырывну, милли тиллерде чыгъарылагъан маълумат къуралларына касбучулар етишмейгенлигини, олай да шолагъа язылывну айланасында тувулунагъан масъалалагъа байлавлу кёп санавдагъы соравларына жаваплар къайтарды.

Шо гюн  Дагъыстанны Гьукуматыны Председатели Абдулмуслим Абдулмуслимов бир-бир газетлени редакцияларына да барды.

Н. БАЙБОЛАТОВ. 

 

Авторизация
*
*
Регистрация
*
*
*
Согласны с условиями сайта?
Генерация пароля