Бугюнлерде Хумторкъали районну Къоркъмаскъала юртда М-З. Баймурзаевни атындагъы школасында 7 – 10-нчу класланы арасында районну оьлчевюнде «Зарница» деген дав-спорт ярышлары оьтгерилди.

Райондагъы билим берив управление дав-спорт ярышлар къурумлу оьтсюн учун, олагъа бары имканлыкъланы болдургъан эди. Ярышланы «Алдынлыланы гьаракаты» деген къурумну район бёлюгюню председатели Жалалутдин Закарьяев ачды ва «Зарница» оюнланы ортакъчыларын къутлай туруп, оюнлар яшёрюмлени патриот ругьда тарбиялавда пайдалы экенни  гьакъында айтды.

– «Зарница» – янгыз гюч сынав, тогъатартыв булан тамамланып къалмай, о ярышланы ортакъчыларыны арасында дослукъну, бири-бирине кёмекге табыла-гъанлыкъны, къаттылыкъны ва къоччакълыкъны тарбиялай. Бугюн барыбызгъа да Украина бойларда хас асгер гьаракатда къоччакъ, игит кюйде Ватанын якълап ябушагъан уланларыбыз бизин учун уьлгю болуп токътай. Биз де олагъа ошамагъа гьаракат этмеге, олар булан оьктем болма герекбиз, – деди оьзюню сёйлевюнде Ж. Закарьяев.

Районда физкультура ва спорт управлениени ёлбашчысы Акъай Османов: – командалар оюнланы 12 де журасындан оьзлени билимлерин ва бажарагъанын гёрсетди. Гранатны арекге атывдан, гюч сынав гимнас­тикадан яхшы гьасиллер гёрсетме бажарды, – деди.

Шу ёрукъдагъы ярышланы барышында охувчулар башлапгъы дав гьазирлигинден, медицинадан,  спортну бажарывлугъундан ва патриот ругьда тарбиялавдан билимлерин бек­лешдире.

 

Жават ЗАКАВОВ.

СУРАТДА: «Зарница» оюндан гёрюнюш.