Артдагъы гюнлени ичинде ата-аналар яшларына къызамукъдан, полиомиелитден вакцина этдирмеге сюймейгенликге, шону гери урагъангъа байлавлу эришивлер, разисизликлер юрюлюп тура демеге ярай. Шо масъалагъа байлавлу болуп алдагъы гюн «Дагестанская правда» газетни редакциясында Дагъыстанны савлукъ сакълав министри Татьяна Беляева ва республиканы Роспотребнадзор къурумуну ёлбашчысы Залимхан Омариев журналистлер булан прес-конференция оьтгерди.

З. Омариев прес-конференцияны башында эсгерген кюйде, респуб-ликабызда гьар гюн йимик къызамукъдан авруйгъанлар гьисапгъа алына.

–Шо югъагъан аврув бир ягъадан коллективлени, школаланы, яшлар бавланы арасында яйылып гетмесин деп, яшланы къорумакъ муратда гьаракат этдик,–деп башлады оьзюню гиришив сёзюн З. Омариев.–Бизин яныбыздан гёрюлген чаралар, гьалны тергевде сакълайгъанны гёрсетеген мисал. Гьали уллу къувунлар гётермеге себеплер ёкъ буса да, тек шо аврувдан къоркъунч бар. Шо саялы да республиканы жамиятын яшлары-гъызны савлугъуну гьайын этип, олагъа чечек яздырмагъа чакъырабыз. Ону пикрусун Дагъыстанны савлукъ сакълав министри тёшлей туруп:

–Къызамукъгъа къаршы вакцина этдирмейгенлени санаву кёп болуп турагъангъа, тийишли кюйде иммунитет къатлавубуз ёкъ. Шолайлыкъ инфекциягъа яйылмагъа ёл бере. Шондан авруйгъанланы янында вакцина этмеген яш къаршы болса, шогъар къызамукъ югъажагъы мекенли. Биргине-бир яшланы шо аврувдан янгыз вакцина сакъламагъа бола. Къызамукъгъа къаршы этилинеген чечек языв 95 процентге иммунитетни гётермеге имканлыкъ бере,–деп инамлы кюйде токъташдырды Т. Беляева. Конференцияда къызамукъ юкъгъанны не йимик белгилерден билмеге бола деген соравгъа министр булай жавап къайтарды: –Бир башлап сувукъ тийгенде йимик иссилиги гётериле, гёзлери йылавукъ бола, бурну да агъылма башлай. Сонг яшны къаркъарасы увакъ къызыл бюрчюкден толуп къала. Бу инфекция яшланы савлугъуна бек зарал гелтирмеге, гьатта оьрчюгюп, кёмек этмеге бажарылмайгъан ерге чыгъып, оьлмеге де бола.

Касбучулар айтагъан кюйде, янгыз яшлар тюгюл, шондан чечек яздырмагъан яшёрюмлеге де, 55 йыл чагъына ерли яшлар булан къатнайгъан уллу тайпа да, муаллимлер, тарбиялавчулар, медицина къуллукъчулар да этдирмеге тарыкъ.