Артдагъы гюнлерде районну башы Даниял Исламов админист-рацияны капитал къурулушгъа ва ЖКХ-гъа къарайгъан управлениени ёлбашчысы Артур Мингалиев булан 1 номерли Львовск юртда болду. Онда ол къурулушу 2021-нчи йылда башлангъан 216 охувчугъа ери булангъы янгы школаны айланасын ва къурулуш ишлени тергеп чыкъды, къурулуш ишлер булан машгъуллулар лакъырлашды.
Ери гелгенде, къурулушда ишлер яхшы юрюлегенни ва бугюнге ишлер 90 процентге тамамлангъанны эсгермеге тюше. Школаны абзарын безенлендирив юрюле ва спорт майданлар ишленип тура. Школаны къурулушу токъташдырылгъан болжалгъа къоллавгъа берилмеге герек. Айтагъаным, гьалиги заманны талапларына толу кюйде жавап береген школаны эшиклери охувчулар учун янгы охув йылгъа ачылмагъа герек.
– «Билимлени оьсдюрюв» деген программагъа гёре яшавгъа чыгъарылагъан чаралар Дагъыстан Республиканы Башчысы Сергей Меликовну къатты тергевюню тюбюнде. Шо программагъа гёре республикада янгы школалар ва яшлар бавлар къурула. Ювукъ арада шо программаны пайдасын львовскили яшлар да гёрежеклер, – деди Д. Исламов, къурулушда ишлейгенлеге баракалла билдирди ва ишин мукъаятлы кюйде ахырына чыгъармагъа чакъырды.
Шо гюн районну башчысы Даниял Исламов Артур Мингалиев де булан юртдагъы артезиан къуюну ва эки сув гьавузну да тергеп чыкъды.
Районну башчысы эсгерген кюйде, хыйлы йылланы узагъында Львовск юртда сувну масъаласы чечилмей тургъан. Нечик алай да, район администрацияны сиптечилиги республиканы ёлбашчыларыны янындан якълав табып, гёрюлген чараланы натижасындан ювукъ гележекде юртлулар таза сув булан толу кюйде таъмин этилежек.
Къуюну янында ерлешген умуми кюйде 400 кубометр сув сыягъан эки сув гьавузну къурулушу да тамамланма аз къалгъан. Къоллавчулагъа етишгенче алдын сувну тазаламакъ учун гьавузланы ювугъунда сувну тазалайгъан бина ва насос станция да къурулгъан сонг, халкъгъа таза сувну токътавсуз кюйде бермеге имканлыкълар болажакъ.
Даниял Исламов ишчилер булан сёйлеген сонг, сув гьавузланы къурулуш ишлерине рази къалды ва оьз гезигинде олагъа тапшурувлар да берди.
