Къарабудагъгент районну Дёргели юртундагъы бир номерли орта школада «Юрекден – юрекге» деген рагьмулукъ гьаракат оьтгерилген.
Эсгерилген охув ожакъны социальный педагогуну къуллукъларын кютеген Н. Шугьайипованы сиптечилиги булан юрюлген шо гьаракатда школаны муаллимлеринден къайры да, устаз Магьамматрасул Хасаев, олай да ругьани къуллукъчулар Абдулазим-гьажи, Багьавутдин-гьажи, Гьажимурат-гьажи, билим беривню район управлениесини ёлбашчысыны заместители Алибек Къайирбеков, охувчу яшлар ва кёп оьзгелери ортакъчылыкъ этген.
Оьтгерилген гьаракатны барышында Дёргели юртда иш гёреген эки де школада билим алагъан атасыз, не де анасыз оьсеген, олай да яшавлукъ шартлары осал агьлюлерде тарбияланагъан яшлагъа шабагьатлы кёмек этилген. Дёргелидеги бир номерли орта школасыны ёлбашчысы Рашияханым Алпанаева бизге билдиргени йимик, яшлагъа шабагьатлы кёмегин болдургъан оьзюню атын билгили этмей къоймакъны тийишли гёрген адам гёрсетген харжгъа 141 яшгъа школагъа юрюйгенде тарыкъ болагъан гьар тюрлю алатлар тапшурулгъан. Шону булан бирге, ону атындан атасыз, не де анасыз оьсеген гьар яшгъа 10-ар минг манат берилген.
Яшавлукъ шартлары осал, чарасыз гьалындагъы агьлюлерде тарбияланагъан яшны гьариси буса, савгъатгъа 5-ер минг манат алгъан. Жыйылгъанлар Аллагьны уллу гюнлеринде яшлагъа этилген шолай шабагьатлы кёмекни бир гёнгюлден къабул этип, оьзлени разилигин билдирген.
Б. АЙБОЛАТОВ.
