Бизин уллу уьлкебиз Россияда бу йыл Май байрам апрельни 28-нден май айны 1-и болгъанча дёрт гюн белгилене. Башлап бу байрам интернационалны гюню деп белгиленип тургъан. 1970-нчи йылдан башлап,  загьматчыланы бирлигини халкъара гюню деп юрюлме башлагъан. 1992-нчи йылдан башлап, Язбашны ва Загьматны байрамы деп юрюле.

 

Дюнья оьлчевде алгъанда бу байрам 1886-нчы йылдан баш ала. Шу йыл 1-нчи майда Америкадагъы Чикаго шагьарны ишчилери баш гётерип орамлагъа чыгъа ва оьзлени талапларын чакъы­рывлагъа язып, айтып аян эте. 12-15 сагьат иш гюнню 8 сагьат этмекни ва алапаларын артдырмакъны, яшланы загьматын гери урмакъны талап эте. Шолай баш гётеривлер Американы оьзге шагьарларында да оьтгериле.

1890-нчы йыл 8 сагьатлыкъ иш гюнню талап эте туруп, Европаны кёбюсю пачалыкъларында да митинг­лер оьтгериле. Бизин пачалыкъда Санкт-Петербургда шолай баш гётерив 1891-нчи йыл М.Брусневни ёлбашчылыгъы булан болгъан.

Совет девюрде, шагьарларда болсун, посёлокларда, юртларда болсун халкъ жыйы­лып, байракълар да тутуп майданларда жыйыла эди. Магьачкъалада болгъан шолай митинглерде кёп керенлер ортакъчылыкъ этме бизге да тюшген. Шагьарны халкъы бирче жыйылып, бир-бирин танымайгъанлар таныш болуп, шагьарны гьар заводу, предприятиеси, къуруму коллективлери булан жыйылып байрамны оьтгере эди. Тахшагьарыбызны майданында музыка согъулуп, асгер къуллукъчулар марш булан юрюйгени эсде къалгъан. Бу йыл да Май байрамда Магьачкъаланы майданына халкъ жыйылажакъгъа, Язбашны ва Загьматны байрамын  шат кюйде оьтгережекге инамлыкъ бар.

 

Яраш БИЙДУЛЛАЕВ.