Наркотиклени къоллайгъанланы, оланы биревню де къызгъанмай рагьмусуз кюйде, къоркъмай, тартынмай яягъанланы, ону торуна кимлер тюшюп, отун­да яллап битегенлени гьакъында алдан берли де язгъанбыз. Бу гертиден де бек оьрчюкген масъала да дюр. Шо саялы да, газетибизни гьар номеринде шо агъуну зараллыгъы гьакъда бере турмагъа да тийишлидир. Неге тюгюл, бир  гиччинев яшлар да шогъар дамагьланагъан болгъан десек де ярай. Эгер сиз авлетлеригиз психикасына, гьакъылына таъсир этеген затланы къоллаймы экен деп шеклене бусагъыз, шону  неден, не йимик себеплерден  билмеге бола деген соравубузгъа республиканы наркология диспансерини баш врачы Салигьат Омарова  англатыв берди.

 

– Биринчилей, яшны оьзюн тутагъан кюйлери алышынма башлай. Мисал учун, бир тамаша тюрлю  хасиятлары, ишлери арагъа чыгъа, юрегинде  оьчлюк тувулунма бола, яда оьзю кёп сююп юрютюп гелген пайдалы ишлерине агьамият бермей, немкъорай янаша. Ондан къайры да, бир себепсиз башы авруй, ашгъа дамагьы болмай яда къаркъарасыны авурлугъу арта, яда азмагъа башлай. Сонг да, низамы бузулуп, парахат кюйде юхлама  бажарылмай.

Шо психикасын алышдырагъан дарманлар савлугъуна оьтесиз яман таъсир эте, гёзлери къызара, шону бебейлери уллу бола, къаркъарасыны гёнюню тюсю алышына, гьакъылы туман-чарс йимик булгъана, – деп токъташдырды наркодиспансерни баш врачы.

Эгер де, авлетигизни савлугъу, гьакъылы, оьзюн юрютеген  кюю алышынгъанын  эслесегиз бир де къарамай нарколог-касбучуну янына консультация­гъа барып, ону  мекенли кюйде тергетмеге герексиз. Заманында агьамият берип,  савлугъуну гьайын этсегиз,  яман аврув къабунгъан яшыгъызгъа кёмек этмеге бола. Салихат Омарова эсгерген кюйде, яшны да, ону ата-анасыны  да аралыкълары инамлы болмагъа тарыкъ. Яш бир затны да яшырмай, оьзюню гьалы гьакъда тюзлюгюн айтагъан кюйде,  ону булан ачыкъдан сабур къайдада лакъыр къуруп бажармагъа тарыкъ.

Сизин яшыгъызгъа касбучуланы кёмеги тарыкъ буса, Шота Руставели 57 «в» орамда ерлешген рес­публиканы наркология диспансерине бармагъа   боласыз. Сиз онда бирев де билмейген кюйде,  яшыртгъын консультация алып,  къаркъарагъызда не йимик наркотиклер барны  ачыкъ этмек муратда тестлерден чыкъмагъа болажакъсыз.

 

П. ГЬАЙБУЛЛАЕВА.