Аманлыкъны къоруйгъан къурумлар Къызылюрт районну Янгы Чиркей юртунда турагъан 35 йыллыкъ жагьил къатынгишиге къаршы уголовный иш ачгъанлар. Ол оьзюню янгы тувгъан яшын сатгъан деп айыплана.
Ич ишлер министерликни маълумат бёлюгю билдиреген кюйде, яшны Москвада яшайгъан Юлия Логинова сатып алгъан болгъан. Уьлкени тахшагьарыны полицейскийлери оьз янындан тергевлер оьтгергенлер. Шоланы натижасында Ю.Логинованы 15 яшы бар экени токъташдырылгъан. Амма оланы бирисини де ол герти анасы тюгюл, барысын да акъча берип алгъан, сонг ялгъан документлер онгарып, оьзюню атына яздыртгъан. Яшларындан «арчылма» гьазир къатынланы ол Интернетден таба болгъан.
Яшланы герти аналары токъташдырылгъан сонг, уголовный иш судгъа бакъдырылажакъ.
Алав АЛИЕВ
