Гьар яш – ата-анасы учун гёз ачгъанда гёреген нюрю, гёзюню бебейи, жаны, къаны. Ата-анасына яшлары жанындан да артыкъ аявлу. Яшланы оьсювю, тарбиясы, гележеги ата-анасындан гьасил бола. Яшда гёрген яшынмас, деп нече да тюз айтылгъан. Яшлар гиччи заманындан берли гёргенин, эшитгенин, сезгенин унутмай, эсинде сакълай.
Биз яшларыбызгъа нечик янашсакъ, тарбия берсек, нени уьйретсек ва оьзюбюз яхшы хасиятлагъа, амаллагъа уьлгю болсакъ, яшларыбыз да торайгъанда шолай болажакъ. Яш бар уьйде яллыкъ ёкъ деп айтыла. Озокъда, яшланы оьсдюрмеге, тарбияламагъа тынч тюгюл. Тек яшларыбызгъа инг башлап, биз, ата-анасы жаваплы экенни унутмагъа ярамай. Яшлары бар агьлюлеге гьакимиятны янындан да айрыча тергев бериле, гьайы этиле. Айрокъда артдагъы бир нече йылны узагъында кёп яшлы агьлюлеге харж да бериле. Тек умуми алгъанда гьар тюрлю масъалалар да ёкъ тюгюл.
Яшланы якълавуну халкъара гюню де 1949- нчу йылда къатынгишилени халкъара демократ федерациясыны генгешинден сонг белгиленген. Яшланы якълавну халкъара гюню биринчилей 1950-нчи йылда оьтгерилген. Шондан сонг яшланы байрамын гьар пачалыкъда дегенлей белгилемеге башлагъан. Яшланы халкъара гюнюню аслу мурады янгыз шо гюн яшланы сююндюрмек тюгюл. Шо гюн оьтгерилеген бары да маданият, яратывчулукъ гьаракатлар яшланы гьар гюнлюк масъалаларына уллуланы тергевюн тартмакъ учун юрюле. Шолай да, яшланы байрамыны мурады–оланы ихтиярларын якъламакъ, билимине, ял алывуна тергев бермек ва гюч, зулму этивден, яшланы загьматы, къыйыны булан пайдаланывдан къорумакъ.
Яшланы халкъара гюнюнде Россия Федерацияны бары да ерлеринде, яшлар тарбияланагъан къурумларда олар учун байрамлар оьтгериле, айрыча тергев бериле. Дагъыстан Республикада бир юрт да, бир шагьар да шо гюн яшланы тергевсюз къоймай. Гьатта яшлар ял алагъан паркларда бары да къуллукълар гьакъсыз этиле. Демек, яшланы сююндюрмек, оланы гёнгюн алмакъ учун гьар тюрлю чаралар гёрюле.
Шагьарланы майданларында оьтгерилген сурат конкурслар да яшланы яшавгъа, айланасына янашывун англамагъа болушлукъ эте. Яшлар кёбюсю гьалда, гюнню, ата-анасыны, агьлюсюню, жан-жаныварны, табиатны суратлай. Конкурсну гьасиллерине гёре яшлагъа савгъатлар бериле.
Тангала, июн айны 1-нде, адатлангъан кюйде Яшланы халкъара гюню бары да ерде оьтгерилежек. Инг башлап «Ёлдаш» газетни бары да охувчуларыны яшларын, газетни охуйгъан, тергев береген бизин гиччипав къурдашларыбызны гьакъ юрекден къутлайман. Гьар басгъан абатыгъыз сыралы болсун, яшавугъуз гьар гюн байрам йимик насипли ва шатлы болсун. Сизге барыгъызгъа да яхшы савлукъ ва парахатлыкъ ёрайман!
Патимат БЕКЕЕВА.
Интернетден алынгъан суратлар.
