Дагъыстанны яшавлукъ-экономика оьсювюню  2030-нчу йылгъа ерли белгиленген программасында къоллавчуланы талапларын гьисапгъа алып, федерал бюджетден таба ломай харжлар булан толумлашдырылагъан регионну бюджетине харлы агьамиятлы тармакъланы атлары айрыча хат булан эсгерилегени негьакъ тюгюл. Шо гьакъда бугюнлерде ДР-ни финанс министри Шамил Дарбишев республикабызны маълумат къуралларына этген баяны тёбенде охувчуларыбызны тергевюне бериле.

 

– Артдагъы 5 йылны ичинде бизин республикабызны къошулчан бюджетини харжлары белгили кюйде къолайлашгъан, – деди Шамил Магьамматович оьзюню баянында. – Дагъы да аянлашдырып айтгъанда,  республикабызны бюджетинден таба этилеген харжлар 130 миллиард манатдан 206 миллиард манатгъа етишген. Озокъда, белигиленген харжлар не учун къолланагъаны гьакъда дагъыстанлылагъа баян бермек бизин – бочубуз.

Алдагъы йылларда йимик, гьали де бизин республикабызда яшавлукъ-маданият тармакълар регион бюджетден берилеген харжлагъа айрокъда харлы. Билим берив, савлукъ сакълав, маданият, яшавлукъ, политика, спорт булан физкультура ва шолай да пачалыкъ маълумат къуралларыны гьажатлары учун 2023-нчю йылгъа да республика бюджетден 146, 7 миллиард манатны оьлчевюнде акъча маялар гёрсетилинген эди. Шону булан янаша оьтген йылда республикабыздагъы ёлланы къурувгъа 14 миллиард, агропромышленный тармакъны оьс­дюрювге 5 миллиардгъа ювукъ бюджет маялар берилди. Озокъда, бюджетден берилген акъча маяланы тёкмей-чачмай, ёлу-ёругъу булан пайдаландырывгъа да тергевню бакъдырмагъа тюшегени гьакъ.

Артдагъы вакътилерде республикабызны яшавлукъ-коммунал къуллукъларын ёрукълашдырывгъа байлавлу болуп къоллавчуланы янындан кёп рази­сизликлер тувулуна. Шо саялы оьтген йыл яшавлукъ-коммунал хозяйствону янгыртмакъ учун 18,6 миллиард манат бюджет маялар пайдаландырылды. Озокъда, къоллавчулар учун лап да агьамиятлы тармакълар федерал бюджетден ва шолай да гьар тюрлю пачалыкъ программаланы янындан берилеген кёмек харжлардан да магьрюм къалмай.

«Онгайлы шагьар шартлар учун», «Юрт хозяйствону асувлулугъу учун», «Асил ёллар – аманлыкъны ёллары», «Таза сув», «Мени Дагъыстаным – мени ёлларым», «Мени Дагъыстаным – мени сувларым», «Юрт территорияланы оьс­дюрюв»  деген ва шолай башгъа агьамиятлы программаланы талаплары учун да бюджетде тюгюл маялар асувлу кюйде пайдаландырылагъаны ачыкъ болуп гёрюне.

 

Къ. КЪАЗАКЪМУРЗАЕВ.