Июль айны 21-нде, гече сагьат тогъуз битип, ич ишлени Избербаш шагьар бёлюгюне денгиз ягъада жагьил адамланы арасында ябушув-токъалашыв  юрюле деп билдирив гелген. Полицейскийлер агьвалат болуп турагъан ерге тез етишген, 13 адамны тутуп бёлюкге гелтирген ва олагъа къаршы алминистратив ишлер ачгъан.

Сонг белгили болгъан кюйде, хоншу Мычыгъыш Республикадан гелген жагьиллер ял алагъан эки гюнюн Каспий денгизни  Избербашны ювугъундагъы бойларында оьтгерме токъташгъан болгъан. Ял ала туруп, гьаракъылар ичген, эсирип, айланасындагъы башгъа адамлагъа тергев бермей бийиме башлагъан, къычырып эрши, эдепсиз сёзлени де айта болгъан.

Ерли адамлар олагъа буварывлар этгенде эришме башлагъан, ахырда сёзден сёз чыгъып, эки де якъны арасында башлангъан эришив ябушувгъа айлангъан. Къалмагъалны токътатмакъ учун, полицейскийлеге къошулма тюшген.

Алав Алиев.