3-нчю апрельде «Россети Северный Кавказ» деген компанияны Дагъыстандагъы филиалы «Дагэнергону» ёлбашчысы Магьамматгьабип Мугьумаев 2,8 миллиард манатны урлагъангъа шеклик этип тутулгъан деген хабар бары да дегенлей маълумат къуралларда чыкъды.

 

Россияны Темиркъазыкъ-Кавказ федерал округдагъы ишлеге къарайгъан МВД-ни ва Дагъыстандагъы УФСБ-ни къуллукъчулары ону уьюнде ва ишлейген еринде тюнтювлер оьтгерген. Артда ачыкъ болгъан кюйде, ону тутмакълыгъы алдагъы ишине гёре оьтгерилген, тек алдагъы иши де «Дагэнергону» гьисабындагъы къурумлар болуп чыкъгъан.

Ахтарывлар гёрсетеген кюйде, шо уллу харжны Мугьумаев ва ону булан тутулгъан 7 адам этилеген ишлеге артыкъ акъчалар язып, алынагъан материалланы багьаларын артдырып этген деп гьисап эте.

– 2,8 миллиард манат урлагъан деп тутулгъан 8 де адам 2024-нчю йылны 3-нчю июн айына ерли эркинликден магьрюм этилежек, — деп билдирген Дагъыстанны Оьр судуну прес-къуллугъуну ёлбашчысы Зарема Мамаева.

 

Алав АЛИЕВ.