Россияны Ахтарыв комитетини Дагъыстан ахтарыв управлениеси уьч дагъыстанлы жагьил адамгъа къаршы уголовный иш ачгъан.
Ахтарывчулар токъташдырагъан кюйде, ата-анасы оланы гиччиден берли бек ёнкютюп оьсдюрген, школа чагъындан тутуп терс ёллагъа тюшген, даим гьакъылбалыкъ болмагъан яшланы ишлерине къарайгъан инспекцияны тергевюню тюбюнде тургъан. Ахырда законну алдында толу кюйде жавап берме чагъы етишгенде уьчюсю де гьар тюрлю жинаятчылыкълар этип, такъсырланып, туснакъгъа тюшген.
Олар бир-бири булан 2022-нчи йылда Дагъыстандагъы 2 номерли колонияда таныш болгъан ва къурдашлыкъ юрютмеге башлагъан. Аманлыкъны къоруйгъан къурумлагъа ачуву бар жагьиллер олагъа нечик буса да «къайтарыш» этмеге токъташгъан. Туснакъ болжалы битип колониядан чыкъгъанда, танышларындан таба 4 гранатны сатып алгъан ва ич ишлени Магьачкъаладагъы бёлюклерини бирисине чапгъын этмеге сюйген. Уьстевюне, гранатлардан къайры,айрыча атылтыв алатны гьазирлеме къарагъан ва шо вакъти тутулгъан.
Ахтарывлардан сонг, оланы ишине шагьарны Совет район судунда къаралажакъ.
Алав Алиев.
