Донбасны азатлыгъы учун кёп санавдагъы дагъыстанлы уланлар хас асгер операцияда ортакъчылыкъ эте. Марат Халиков — олардан бириси. Танк биатлондан дюньяны чемпиону Марат Халиковну аты 2014-нчю йыл шо ярышланы утгъанда белгили болду.
Ол Украинадагъы хас асгер операцияда биринчи гюнлеринден тутуп ортакъчылыкъ эте. Бир урушда ол экипажы булан алгъа чыгъа ва къаршы тургъан бир нече танкны ва бёлюклени дагъыта. Тек танкына да топ тие ва гьайдап болмайгъан кюйде зараллана. Контузия алгъан ва гёзлери зараллангъан Марат, яралангъан асгер ёлдашын да алып, шо ерден тая. Сонг оьзлени танкы миллетчилени къолуна тюшмесин деп къайтып, танкны атылта.
Буссагьатгъы вакътиде Марат къолайлыкъгъа тартгъан ва уьйге къысгъаракъ отпускагъа йиберилген. Ону булангъы журналистлени ёлугъуву РИА «Дагъыстан» деген агентликде оьтгерилди.
– Мен дав машинимни къызгъана туруп атылтдым, тек шолай этмеген буса, о миллетчилени къолуна тюшежек эди, – дей Марат Халиков. – Гьали мени отпускагъа йибергени Ораза байрам булан раслашып къалды. Байрамдан сонг асгер къуллугъумну кютеген бёлюкге къайтажакъман.
Журналистлени соравларына жаваплар бере туруп, Марат Халиков Украина бизге дос республика кююнде къалгъанны, адамлар оланы кёп сююп къаршылайгъанны ва хас асгер операция оланы миллетчилерден азат этмек учун юрюлегенни айтды.
Ол асгердегилени ругьу бар, олар къайсы операцияда да тартынмай ортакъчылыкъ эте, рагьмулукъ кёмек этилегенни ва асгердегилеге бары да зат етишегенни хабарлады.
Бизин маълумат.
