Бу йыл февраль айны 15-нде бизин совет асгерлер Афгъанистандан чыкъгъанлы 34 йыл тамамланды.
Эсгерилген агьалатгъа байлавлу Къызылюрт шагьар администрациясыны янында чара оьтгерилди. Мунда жыйылгъанланы бу эсде къалыр йимик агьвалат булан къутлай туруп, Къызылюрт шагьарны башчысыны биринчи заместители Малик Патахов ва Къызылюрт район администрациясыны башчысыны заместители Адил Гьажаматов, Афгъанистанда интернационал борчун кютген уланланы атына исси сёзлер айтды.
РД-ни Къызылюрт шагьаргъа, Къызылюрт ва Хумторкъали районлагъ къарайгъан военный комииссары Шейхсайит Магьамматов да шолай гьалда къуллукъ этген уланлагъа разилик билдирди.
Афгъанистан давну ветераны солтанянгыюртлу Абдулкъадыр Абукъовгъа шагьарны гьакимбашыны атындан Баракалла кагъыз тапшурулду. Бизин асгерлер Афгъанистандан чыкъгъанлы 30 йыллыгъына байлавлу юбилей медал Ибрагьим Темирхановну тёшюн безеди.
Афгъанистанны ветеранлары гьаман да йимик, бу гезик де эсгерилген чарада ортакъчылыкъ этдилер. Оланы арасында запасдагъы подполковник Агьмат Гьюсейнов, муцалавуллу Эдил Ибрагьимов, эндирейли Къанболат Салавов, солтанянгыюртлулар Абдулкъадыр Абукъов ва Муса Аскерханов, чонтавуллулар Ибрагьим Темирханов, Сахай Умаров ва Къонакъбий Гьажиев, Янгы Солакъ посёлокдан Рашит Магьамматов да бар эди. Бу уланлар ортакъчылыгъын болдурмагъан шагьарда наягь агьвалат ёкъдур демеге ярай. Олагъа биз де артыкъ савлукъ ва баракалла билдирме сюебиз.
Афгъанлыланы атын юрютеген ял алывну бавунда ерлешген мемориал эсделигинде Афгъаныстанда жанын къурбан этгенлерден 11 адамны сураты салынгъан. Россияны Игити Нугьутдин Гьажиевни сураты лап да орталыкъда ерлешген. Огъар тийип, ону онг ягъында буса юртлум, оьзю де шавхал янгыюртлу Алхан Къапаровну сураты эсделикни безей. Бираз ариде сол янда буса, чонтавуллу Ибайдулла Гьимбатовну сураты бар.
Афгъанлыланы эделигине салынгъан мемориал эсделигине гелген къонакълар ва шагьарлылар гюллер салдылар.
Бу чараны ахырында афгъанлылар эсделикге сурат алдырдылар.
