Магьачкъаланы Киров район судунда Моника Халитованы уголовный ишине къаралгъан.
Судгъа бакъдырылгъан материаллагъа гёре, М.Халитова 2014-нчю йылны яй айларында самолёт булан Магьачкъаладан Истанбулгъа учгъан болгъан. Тюркияны тахшагьарында алданокъ сёйлешинген кюйде, белгисиз адамлар ону дазудан оьтюп Сириягъа чыгъаргъан. Арап пачалыгъында ол террорчу къурумлагъа къошулуп, ерли гьакимиятгъа къаршы юрюлеген давларда ортакъчылыкъ этеген эри Салигь Абакаров булан ёлукъгъан. Тек арадан бир ай да оьтмейли, С.Абакаров пачалыкъ асгерлени къамавуна тюшюп оьлген. Шо заман 30 йыллыкъ М.Халитова яшларын да алып, Дагъыстангъа къайтмагъа токъташгъан. Мунда огъар къаршы уголовный иш ачылгъан.
Суд РФ-ни Уголовный кодексине гёре М.Халитованы савутлангъан законсуз гюплеге къошулгъан саялы 5 йылгъа эркинликден магьрюм этмек деп тёре гесген. Судну къарары къатынгишини лап гиччи яшына 14 йыл битген сонг гючге гирежек.
Алав Алиев
