Донбассны халкъыны аманлыгъын сакъламакъ учун юрюлеген хас асгер гьаракатда 10 мингден де артыкъ дагъыстанлылар ортакъчылыкъ эте. Оланы кёбюсю шо гьаракат башлангъандан берли оьзлеге салынгъан борчну намуслу кюйде кютелер. Миллетчилеге къаршы ябушувларда, не амал, оьлегенлери де бар. Олар уьлкени гележеги учун жанын да аямайлар.

 

Шо агьвалатларда жанын къурбан этгенлени агьлюлерине айрыча тергев этиле. Яшавлукъ гьалларын яхшылашдырмакъ учун бары да къуллукъдагъылар къаст этелер.

Оьтген гюнлерде Хасавюрт район администрацияны башчысы Арсланбек Алибеков дав майданда къоччакълыкъ гёрсетип жанын берген уланланы дос-къардашына пачалыкъ савгъатланы тапшурду. Ёлугъувгъа гелген Арслан Къурбановну агьлюсюне ва атасыны инисине Къоччакълыкъны орденин тапшура туруп, Алибек Абдулмажитович къайгъырышывун айтды ва шолай уланны тарбия­лагъан ата-анагъа баракалласын билдирди.

Абусупиян Гьажиев де бизге янгы къошулгъан республикаланы халкъыны аманлыгъын сакълайгъанда жанын къурбан этген. Ол оьлгенден сонг «Ватанны алдындагъы лайыкълы къуллугъу учунгъу орденни 4 даражасы булан савгъатлангъан. Савгъатны районну башчысы ону агьлюсюне ва анасына тапшурду.

–Бугюнлерде Ватанны якълавчулары оьтгерилип турагъан хас асгер гьаракатда къоччакъ кюйде ортакъчылыкъ эте, — дей А.Алибеков. – Сизин уланларыгъыз да янгы къошулгъан республикаланы харлысызлыгъы учун жанын берген. Биз олар булан оьктембиз, неге тюгюл башгъаланы къутгъармакъ учун оьз­лени аямагъан.

Олар яшланы, къатынгишилени ва уллу чагъындагъыланы якълап, игитлер йимик жан бергенлер. Оланы игитлигин эсгере туруп, Уллу Ватан давдагъа бизин уллаталарыбызны къоччакълыгъын гёз алгъа гелтиребиз. Бугюн хас асгер гьаракатда ортакъчылыкъ этеген уланларыбызгъа олар уьлгю болгъан. Сизин къайгъыгъызны англайман, инг де сюеген адамларыгъыздан айырылгъансыз, тек сиз де, дос-къардашыгъыз да, ингдеси, авлетлери де оланы игитлиги булан оьктем болма герек. Оланы атлары даимге эсибизде къалажакъ, бизге буса сизин  гьайыгъызны этмек борч бола.

Ёлугъувда районну башчысыны орнунбасары Исмайыл Шайыпов, Хасавюрт шагьарны, Хасавюрт ва Новолак районланы военный комиссары Давут Абакаров ва «Бирикген Россия» деген партияны секретары Асият Арсланханова  ортакъчылыкъ этдилер.

 

Г.БЕК.