Уьстюбюздеги йылда бир керен гелеген Рамазан айны сыйлап, яшавубузда бир яхшы амал этмекни гьайындабыз. Бугюнлерде оразаны ачагъан заманда биз нечик сююнебиз, Рамазан айны оразасын тутмакъны зувабы уллу йимик, ону ачмакъ учун сурсат берген адамгъа да шолай зувабы тиегени юрекге балгьам болуп токътай.
Къызылюрт шагьарда республикабызны шагьарларындан ва районларындан чыгъып яшайгъан къумукълар аз тюгюл. Дейгеним, оланы кёплери тутгъан оразасын ачагъанлагъа аш-сув булан дегенлей садагъа гьисапда рагьмулукъну болдурдулар.
Энни шолай кёмек къолун ялгъагъанланы арасында темиравуллу Сайпутдин ва Гьамзат Жакъавовланы, яхсайлы Артур Акъавовну, Стальский юртдан Гьанипа Мамаевни ва ювукъ арада ерлешген юртланы жамаатыны атына разилик билдирме сюемен.
Шо гюн мунда къурулгъан чатырны тюбюнде 1500 адам оразасын ачгъан. Этген садагъаларыгъызны, тутгъан оразаларыгъызны Аллагьу таала къабул этсин!
Ифтарны вакътисинде Темиравулну имамы хапиз Давут Гьажиев, Арсланали-гьажи Аскеров (Чонтавул) ва Иманали Убардинов (Солтан Янгыюрт) жыйылгъанлагъа Рамазан айны сыйлылыгъы гьакъында насигьатлар берди.
Бойнуна алып, бу инсаплы ишни ахырына ерли чыгъаргъан Гьамзат Жакъавовгъа Къызылюрт шагьарны имамларыны Советини председатели Али Къасумов баракалла кагъыз ва савгъат тапшургъан.
Алибек САЛАВАТОВ.
СУРАТДА: савгъатлавну вакътиси, онгдан биринчиси Гьамзат Жакъавов.
