Биз алдын ерли де эсгергенибиз йимик, Украина бойда юрюлюп турагъан хас асгер гьаракатны якълавда ортакъчылыкъ этеген Россияны асгер къуллукъчуларына савлай Дагъыстандан ашамлыкъ сурсат маллар ва башгъа тюрлю тарыкъ-герек етишдириле.
Артдагъы гюнлерде де ДР-ни Башчысы Сергей Меликовну ДР-ни Халкъ Жыйынына Чакъырывундан сонг, Афгъанистан давну ветеранлары хас асгер операция юрюлеген бойдагъы агьвалатларда ортакъчылыкъ этегенлеге сув ва оьзге тарыкъ-герек рагьмулукъ югю булан сапар чыкъды.
Бу гезик де шолай кёмек Къызылюртда Афгъанистан давну ветеранларыны сиптечилигине гёре юрюлдю. Айтагъаным, шагьардагъы «Патриоты» деген Афгъанистанда интернационал борчун кютген ветеранларыны советини ортакъчысы, шо къурумну ёлбашчысыны заместители, Къызылюрт шагьарны башчысыны кёмекчиси оьзю де эндирейли Къанболат Салавовну ёлбашчылыгъы булан Рагьмулукъ юк булангъы автомашинлени колоннасы сапар чыкъды. Мунда тарыкъ-герекден къайры да, школаланы охувчулары онгаргъан посылкалар ва язгъан кагъызлар да бар.
Рагьмулукъ кёмекни болдурувда Къызылюрт шагьарда ерлешген «Югспецстройэнергомонтаж» деген акционер жамиятыны коллективини къошуму гёрмекли. Айтагъаным, эсгерилген къурумну генеральный директору, ДР-ни Халкъ Жыйыныны депутаты Гьажи Биярсланов да гуманитар кёмекге оьз ягъындан айрыча къол ялгъады.
Рагьмулукъ юк булан сапар чыкъгъанлар Донецк Халкъ республикасыны янында Запорожск областда ерлешген Михайлов районунда юрюлюп турагъан хас асгер гьаракатны якълавда ортакъчылыкъ этеген бизин якълылагъа гуманитар юкню тапшургъанлар.
Мунда Волноваха ва Осиповское деген ерлерде оьтгерилген ёлугъувлар таъсирли кюйде оьтген.
Алибек САЛАВАТОВ.
СУРАТДА: ёлугъувдан гёрюнюш.
