Бабаюрт райондагъы Татаюрт, Тамазатёбе, Львовск 1, Янгылбай, Люксембург, Адил  Янгыюрт ва Герменчик юртланы жамиятлары хас асгер гьаракатда ортакъчылыкъ этеген уланлар учун рагьмулу кёмек жыйгъан. Шо кёмекни гьаракат юрюлеген бойгъа алып Бабаюрт район газетни баш редактору Герейхан Гьажиев, район администрацияны яшёрюмлени, спортгъа къарайгъан  бёлюгюню ёлбашчысы Арслан Далгьатов, жамият  ишлени юрютеген Ислам Исламов и Алберт Хасболатов баргъанлар.

 

Оланы мурады – Бабаюрт бойдан хас асгер гьаракатда ортакъчылыкъ этеген уланлар булан ёлукъмакъ ва оланы асгер къурдашларына савгъатлар бермек болгъан. Тек гьал башгъа болуп чыгъа. Олар гьар токътагъан бойдагъы постларда да савгъатлар бере туруп гетгенлер.

Алдагъы Бабаюрт районну МВД-сини начальнигини орнунбасары болуп тургъан, гьали Запорож областны Приазовск районуну МВД-сини начальниги, полицияны подполковниги Адилхан Адилханов, Приморское юртда буса алда Геметёбе юртну башчысы болгъан Къураш Гьажигишиев, Мариупольдан сонггъу юртда ротаны командири Осман Османов булан  ёлукъгъан. Васильевка деген шагьаргъа барагъандагъы постларда ёлукъгъан бизин якълыларыбызгъа савгъатлар бере туруп гетгенлер.

– Васильевка шагьарда биз хас гьаракатны биринчи гюнлеринден тутуп ортакъчылыкъ этеген, Бабаюрт больницаны баш врачы Шыхмагьаммат Дугужев, къоччакълыкъ гёрсетген, танк батальонну командири  Адил Къандавуров ва башгъа къумукълар булан ёлукъдукъ, — дей Герейхан Гьажиев. – Бизин гёрме сююп 200 чакъырым ариден гелгенлер де бар эди. Бизин дагъы ари барма къоймадылар, неге тюгюл шо бойларда дав агьвалатлар юрюле эди. Тапшурулгъан борчну да кютюп, биз уьйге къайтдыкъ ва кёмек къолун узатгъанлагъа уланланы атындан баракалла да билдирдик.

Герейхан Гьажиев газетни гелеген номеринде этген сапарыны гьакъында толу кюйде язажакъ.

 

Г.БЕК.