Экономиканы шартларында, савлай уьлкебизде йимик, бизин республикабызда да артдагъы йылларда агропромышленный тармакъ учун гьалиги янгы талаплагъа гёре билимли ва бажарывлу касбучуланы гьазирлев жаваплы борч санала.
Неге десегиз, пачалыкъны ва халкъны сурсат аманлыгъын болдурувда аграр тармакъны асувлулугъуну къолайлашыву юрт хозяйство къуллукъчуланы сынавуну ва усталыгъыны даражасы булан туврадан-тувра байлавлу.
Алдындагъы гюнлерде Магьаммат Жамболатовну атындагъы Дагъыстан аграр пачалыкъ университетде оьтгерилген пикру алышдырыв сессия аграр тармакъ учун къуллукъчулар гьазирлевню агьамиятлы масъаласына багъышлангъан эди. Сессияны ачды ва юрютдю Дагъыстанны юрт хозяйство ва сурсат министрини биринчи заместители Шарип Шарипов.
– Гёрмекли агьвалат булан пикру алышдырыв жыйынны ортакъчыларын гьакъ юрекден къутлайман, – деди Шарип Исмайылович. – Арагъа салынгъан агьамиятлы масъалалагъа байлавлу болуп сизден гележек учун асувлу таклифлени де къаравуллайман. Дагъыстан Россияда аграр республика гьисапда танывлу. Шону учун регионну юрт хозяйствосуну мердешли тармакъларыны талапларын гьисапгъа алып, оьзгелени сынавуна да гёз къарата туруп пикру алышдырма чакъыраман.
Пикру алышдырывну ортакъчыларыны арасында аграр тармакъ учун кадрлар гьазирлевде билим беривню экономика булан байлавлукъда юрютмеге тюшегени, аграр илмуну кюрчюлерин мактаплардан тутуп уьйретмеге, агрокласланы болдурмагъа тюшегени гьакъда генг кюйде гьакълашыв юрюлдю.
Видеоконференцияны имканлыкъларындан пайдаланып, сессияда ону ортакъ-чылары Анападагъы юрт хозяйство техникумуну директору Иван Чернышев оьз сынавуна гёре берген таклифлеге де тынглады. Шонда агьамиятлы проектлер эсгерилген техникумну кюрчюсюнде нечик яшавгъа чыгъарылагъаны гьакъда баянлыкъ берилди. Баянлыкъда гелтирилген далиллеге гёре, аграр тармакъны талапларын гьисапгъа алып, касбучуланы гьазирлевде школаланы ва агропромышленный тармагъыны предприятиелерини арасындагъы байлавлукъланы беклешдирмеге тюшегени гьакъда айрыча эсгерилди.
Къ. КЪАЗАКЪМУРЗАЕВ.
